Jose Luis Bilbao Bizkaiko ahaldun nagusiak Bilboko foru jauregian hartu du gaur Eunate Agirre munduko bodyboard txapeldun berria. Ekitaldi horren bidez, kirolari sopeloztarrak bere ibilbide luzean zehar egindako esfortzua eta Bizkaiaren enbaxadore moduan egindako lana egin izana aintzatetsi nahi izan zaizkio. Horregatik, makila oparitu dio ahaldun nagusiak. Era berean, Jose Luis Bilbaok adierazi du Eunate Agirre mundu osoan zehar jokatutako txapelketetan lehiatu izanak lagundu duela "Bizkaia eta bizkaitarrak ezagutarazten eta gure lurralde historikoa munduan milaka jarraitzaile dituen kirol horren, bodyboardaren, mapan jartzen". Argazkia: © Bizkaiko Foru Aldundia.
Eunate Agirrek igandean irabazi zuen munduko bodyboard txapelketa, azken proban bere aurkari handienarekin, Isabela Sousa brasildarrarekin, lehiatu eta gero. Baina ez da hori sopeloztarrak bere kirol ibilbidean lortu duen lehenengo garaipena, agian bai garrantzitsuena. Izan ere, lehiaketetan parte hartzen hasi zenetik, hainbat txapelketatan finalista izatea lortu du: birritan izan zen Europako junior txapelduna (1998-1999 eta 1999-2000); 2009an, bederatzigarren geratu zen mundialean eta hirugarren, berriz, Europako txapelketan; 2006an jokatutako bodyboard-zirkuituaren zati handi batean lider izan zen, baina, azkenean, laugarren izatearekin konformatu behar izan zuen; 2007an, Europako txapelketa irabazi zuen; 2008an, berriro ere laugarren izan zen mundialean; eta 2009an, munduko bigarren bodyboarder onena izan zen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun