Biharko ekitaldian ETAren biktima ez diren beste guztiak baztertzea egotzi dio Bilduk Getxoko Udalari
Bihar, ostirala, "terrorismoaren biktimak" omentzeko ekitaldi instituzionala egingo du Getxoko Udalak. Dirudienez, azaroaren 10eko Memoriaren Egunerako aurreikusita zeukaten, baina atzeratzea erabaki zuen tokiko erakundeak. EAJ, PP eta PSE-EEren parte hartzea ziurtatuta dauka ekitaldiak. Bilduk, ordea, ez dela joango eta plazaratuko duten adierazpenarekin bat ez datorrela adierazi du, prentsa ohar bidez, "biolentzia ezberdinek eragindako giza sufrimendu osoari erreparatuko ez zaiolako". Gainera, beste alderdiei aurpegiratu dietenez, "aipatu adierazpena Bildu Getxoko Udalbatzaren parte ez zenean —aurreko agintaldian— onartu zen eta ez du ordezkatzen gaur egungo Osoko Bilkuraren ahotsa". Koalizio soberanista eta independentistak adierazi duenez, "Bildun argi daukagu ezinbestekoa dela indarkeria mota guztiek eragindako biktima guztiak aintzat hartzea. Horregatik, gure gain hartzen dugu Gernikako eta Aieteko adierazpenetan jasotako kezka eta erantzukizuna". Biharko ekitaldia 12:30ean izango da, 2010eko uztailaren 12an San Inazio elizako zelaigunean lekututako eskulturaren ondoan, Negurin. Egun horretan, ETAren biktimak baino ez zituen omendu Getxoko Udalak. Plazaratutako agirian, Euskadi Ta Askatasuna erakundeak hildako 17 pertsona baino ez ziren jaso.
"Jarrera inklusiboa eta ez baztertzailea duen eta indarkeria guztien isla den adierazpen edo ekimen baten aldeko gogoa dugu eta horregatik aspaldi hasi ginen lanean eta horrela adierazi genion EAJri. Ez dugu uste hori biharko utzi daitekeen lana denik. Ez Getxon, ezta beste inon ere, ez ditugu biktimen arteko kategorizazioak onartuko. Kontakizun guztiek eragindako kaltea aitortu behar da. Euskal Herria da urteetan luzatzen ari den gatazka honen biktima nagusia; horregatik Bilduko kideok Getxotik ere gatazkaren konponbide integralaren alde egiten saiatuko gara. Horretarako deia egiten diogu bai Udalbatzaren parte diren talde politiko guztiei, baita herriko eragile eta banakoei ere", azaldu du Bilduk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun