Unai Elorriagak idatzitako ipuinean, pertsonaia xelebre batzuei gertatzen zaizkien pasadizoen bidez, trikitiaren nondik-norakoak azaltzen dira: nondik datorren, zelan jotzen den, zeintzuk erritmo erabiltzen diren, eta abar. Istorioan zehar pertsonaiek hainbat kanta abesten dituzte, diskoan biltzen direnak hain zuzen ere. Kanta horien letrak ipuinean txertaturik ageri dira, baita pieza horiek trikitiarekin jotzeko partiturak ere.
Partiturak trikitia ikasleei zuzenduriko oharrekin ageri dira, kasu bakoitzean nota non dagoen edo zein atzamarrekin jo behar den jakiteko. Liburuaren amaieran aipaturiko oharrak ulertzeko argibideak eskaintzen dira.
Unai Elorriaga idazle algortarrak kaleratu berri dituen "Erramunen soinua" umeentzako liburu, disko, partitura eta jolas multzoa jendaurrean aurkeztuko ditu asteartean, hilak 6, Durangoko Liburu eta Disko Azokako Haur Literatura Aretoan. Arratsaldeko 1etan izango da hori. Ordu erdi lehenago, Elorriagak berak eta Irati Jimenezek "Deia" egunkariaren "Ortzadar" gehigarrian idatzitako artikuluen bilduma plazaratuko dute, azoka ondoko Ahotsenea gunean. "Erramunen soinua"-n, Elorriagak trikitiaren mundua azaltzen duen umeentzako ipuina idatzi du, tartean hainbat abesti plazaratzen dituena, eta horren gainean Xabi Aburruzaga eta Jose Urrejolarena trikitilariek kantei musika jarri diete, pieza berriak sortuz. Eider Eibarrek, ordea, irudi grafikoa eman dio proiektu osoari. Lana Bizkaiko Trikitixa Elkarteak argitaratu du, trikitia sustatu eta irakaskuntzan laguntzeko zein orain arte jorratu gabeko publiko bati, umeei, materiala eskaintzeko. Argazkian, Unai Elorriaga.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun