Bildu koalizioak atzo bere jarrera argi utzi ostean, EAJ, PP —Marisa Arrue bozeramailea falta zitzaien— eta PSE-EE alderdiek parte hartu dute gaur Getxoko Udalak deitutako "terrorismoaren biktimak" omentzeko ekitaldi instituzionalean. Egindako adierazpenetan, Imanol Landa alkateak atzera egin du denboran, 2009ko martxoko udal osoko bilkura gogoratuz, gaurko ekitaldiaren "zergatia" azaltzeko. Horren ondotik, 2010eko uztailaren 12an ETAk hildako 17 pertsona omendu zituzten San Inazio elizako zelaigunean lekututako eskulturaren ondoan, Negurin. Otsailaren 5ean, berriz, "1936ko gerran, aurreko gatazka zibiletan eta frankismo garaian Getxo udalerrian izandako biktimei" gorazarre egin zieten Galean. Bilduri dagokionez, orain bi urteko adierazpena "Getxoko Udalbatzaren parte ez zenean —aurreko agintaldian—" onartu zela eta "egungo Osoko Bilkuraren ahotsa" ordezkatzen ez duela argudiatu zuen atzo, gaur ez agertzeko erabakia arrazoitzeko. Beste alde batetik, 2009an ezker abertzaleak ez zeukan Udalbatzarrean parte hartzeko aukerarik, Alderdien Legea zela medio. Bestalde, ETAk aurtengo urriaren 20an iragarri zuen borroka armatuaren behin betiko amaiera. Koalizio soberanista eta independentistak atzo kritikatu zuen "biolentzia ezberdinek eragindako giza sufrimendu osoari ez zitzaiola erreparatuko" gaurko ekitaldian. Argazkian, EAJ, PP eta PSE-EEren udal ordezkari gehienak minutu bateko isilunea egiten San Inazio plazan.
Txistulari batek "Agur jaunak" jo, ondoren minutu bateko isilunea gorde, eta Imanol Landa Getxoko alkateak San Ignazio plazan jarritako eskulturan lore sorta bat utziz burutu du omenaldia Getxoko Udalak, ekitaldi xume batean. Udal agintariak aipatu duenez, "Udalbatzaren alderdien adostasunarekin", azaroaren 10eko Oroimenaren Egunaren data aldatzea erabaki zuten, "hauteskundeen garaitik kanpo egin ahal izateko". "Horrela, pasa den azaroaren 25ean burututako Bozeramaleen Batzordearen bileran alkateak eta Udaleko talde politiko guztiek, Bildu izan ezik, oroipena gaur, abenduaren 2an, egitea erabaki zuten. Bilduk bere desadostasuna agertu zuen eta parte ez hartzeko erabakia ere", gaineratu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun