Ana Maria Gonzales 26 urteko gaztea Peruko etorkin eta jendarte integratzailea da. 2007an bere praktikak Aspace elkartean egitera sartu zenez geroztik "oso era aktiboan hartu du parte astialdirako zerbitzuan, gogo eta ahalmen handiz, gorputz eta buruz arituz". Besteak beste, aisi klubean, senideentzako atseden ekimenean, egun bateko txangoetan, atzerrirako bidaietan edota udako kanpamenduetan kolaboratu du.
Bestalde, Asebi elkarteak 25 urte daramatza bizkarrezur bifidoa duten pertsonen bizimodua hobetzen alde lan egiten. Egun, 350 kide ditu Bizkaia osoan eta urte hauetan emaitza positiboak lortu ditu, tartean, bizkarrezur bifidoa duten ikasleak gizarteratzeko laguntzak lortzea zein gurasoentzako jarduerak egitea, beren seme-alabei heziketan laguntze aldera.
Ana Maria Gonzales eta Asebi bizkarrezur bifidoa pairatzen dutenei lotutako elkarteak jaso zituzten atzo Getxo udalerrian urtero ematen dituzten boluntariotza sariak, pertsona eta erakunde kategoriatan, hurrenez hurren. Fegevol Boluntariotza Erakundeen Federazioak eman zizkien saria Itzubaltzeta / Romoko Gobelaurre Boluntariotza Zentro berrian antolatutako XVIII. Boluntarioen Topaketetan. Gonzales eta Asebi "besteen mesedetarako eta laguntzarako eskainitako denboragatik eta esfortzuagatik" aukeratu zituztela azaldu dute Getxoko Udalaren iturriek, udala ekimeneko laguntzailea baita. Argazkian, jesarrita, Ines Orella Asebiko ordezkaria. Zutik, eskerretik eskumara, Imanol Landa Getxoko alkatea, Juan Jose Quiñones Fegevoleko presidentea, Ana Maria Gonzales jendarte integratzailea eta Elena Coria Gizarte Serbitzuetarako zinegotzia / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun