Hiru egunez Areetako Xake plazako orain arte anonimo izan diren baina etorkizun oparoa duten artisten lanen erakustoki erraldoia izango da. Erakusketak oso genero ezberdinak hartzen ditu: pintura, eskultura, argazkia, bideoa, marrazkia eta grabatuaz gain, estetika erlazionaleko lanak egongo dira ikusgai. Horrela, ekitaldi honetara datozen bisitariek ikuspegi oparoa izango dute begien aurrean. Getxoarten aukera artistiko guztiak sartzen dira, proiekturik pertsonalenetatik hasita eta talde proiektuetaraino. Gainera, euskal arte produkzio garaikidearen orainaren eta etorkizunaren irudi bizia da. Aurtengo partaide gehienek Euskal Herriko Unibertsitateko Arte Ederren Fakultatean ikasten dute. Getxoartek lankidetza estua dauka fakultate horrekin hain zuzen ere.
Nobedadeak
Aurtengo nobedadeei dagokienez, batetik, bisita gidatuak egiteko aukera eskainiko da (hilak 3 eta 4, 18:00etan; aurretik izena emanda). Bestetik, gaztetxoek arte sortu berriaz gozatu ahal izango dute haurrentzako tailerretan (hilak 3 eta 4, 12:00etatik 13:30era; aurretik izena emanda).
Atzo zabaldu zuten Getxoarte 2011, Getxoko Arte Sortu Berrien Aretoa. Aurten 51 artista gaztek parte hartuko dute ekimen horretan, Euskal Herriko arte plastiko eta bisualen sorkuntza berria bultzatzeko eta sustatzeko asmoa duena. Ohi bezala, erakusketa Areetako Xake plazako karpan izango da eta, bertan, bisitariek hainbat lan-mota izango dituzte ikusgai: pinturak, argazkiak, marrazkiak, grabatuak eta ikus-entzunezkoak, besteak beste. Arte Sortu Berrien Aretoa arte proposamenik gazteenen erakusleiho bilakatzeko eta, era berean, sortzaile berriek euren lana ezagutzera emateko asmoz sortu zen, Getxoko Kultur Etxeak zehaztu duenez. Gainera, artista gazteek esperientzia praktikoa dute Getxoarten eta haien lanetan interesa duten pertsonekin zuzeneko harremana izan dezaten, bai ikusleekin, bai sektoreko profesionalekin. "Horrela, era natural eta profesionalean, parte hartzaileek, inolako oztoporik gabe, haien lanak gustuko dituzten ikusleekin hitz egin dezakete zuzenean", azaldu dute arduradunek. Azokaren ordutegia 11:00etatik 14:00etara eta 17:00etatik 21:30era (igandean, 21:00etara arte) izango da. Sarrera 2 eurotan dago. Argazkia: © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun