Zorion Salsamendi, Eneko Bilbao eta Iker Mendizabal bilbotarrekin batera, Borja Gutierrez “Bakerito” preso berangoztarra epaitu zuten joan zen astean Parisen. Epaiketa maiatzean eginiko lehen prozesu baten errepikapena izan da. Izan ere, orain dela sei hilabete egindako epaiketa hartan auzipetuei ezarritako zigorrak oso baxuak zirela argudiatuta fiskalak helegitea jarri zuen, prozesua berriz errepika zezaten, Bilboko Branka agerkariak zabaldu duenez. Helegitea onartu egin zuen Frantziako Estatuko Justiziak eta horren ondorioz epaiketa berriz errepikatu dute. Borja Gutierrez errefuxiatu berangoztarra 2006ko abenduaren 2an atxilotu zuen Frantziako Poliziak, Bilbao eta Salsamendirekin batera, ETAko kideak zirelakoan. Egun, La Santeko espetxean daukate eta datozen hilabeteotan berriro epaituko dute beste prozesu batzuengatik. Argazkian, Sei Herri elkarteak atzo Berangon egindako ibilaldi neurtuan espetxeratutako herrikideak gogoratu zituzten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun