Larunbatean gertatutakoaren harira, izaera horretako delitu guztiak salatu ditu prentsa ohar bidez Leioako Udalak, "gaitzespena are handiagoa izanik biktima adingabekoa denean". Ertzaintzak 45 urteko gizon bat atxilotu zuen herenegun udalerrian, 10 urteko neskato bat hartu eta etxebizitza baten trastelekuan eraso egitea egotzita. Horixe bera ziurtatu dute ikertzaileen iturriek, hainbat albiste agentzien arabera. Hori dela eta, tokiko erakundeak laguntza eta babesa helarazi nahi izan dio adingabekoaren familiari, "aurretik egin izan den moduan". "Une latz hauetan familiak Leioako herriaren eta gizarte osoaren babesa behar du, eta familiak eskatutako enpatia, diskrezioa eta errespetuarekin lortu behar dugu", gaineratu dute udal arduradunek. Ustezko erasotzailea atxiki zuten herritarrei, berriz, "eskerrik beroenak" eman dizkiete, "euren ausardia, arintasuna eta trebetasunari esker, Udaltzaingoa lehenik eta Ertzaintza ondoren etorritakoan, erasotzailea harrapatzea posible egin izan zutelako". Argazkian, Emakumeen Egunean ez ezik, azaroaren 25eko Emakumeenganako Indarkeriaren Aurkako Nazioarteko Egunean ere egiten dute elkarretaratzea Leioan.
Halaber, Justizian duen "konfiantza" izan du aipagai Leioako Udalak, "Legearen ezarpen zorrotzarekin, posible izango delako ekintza mota hauek behar bezala zigortuak izatea eta hurrengokoak saihestu ahal izango direlako". "Denon laguntzarekin, komunikabideetakoa barne", Leioako herriak eta familiak lasaitasuna eta normaltasuna berreskuratzea nahi du tokiko erakundeak, "hau da, herriko gaurkotasunean oinarri izan diren segurtasuna eta lasaitasuna berreskuratzea". Atxilotutako gizona Getxoko epaitegira eraman dute jada.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun