Kirol Portuko Quality dantzalekua eraikitzeko lanak geldiarazteko erabakia iragarri zuen joan den ostiralean Getxoko Udalak. Gaurkoan, berriz, orduko prentsa oharrean azaldutako "puntu guzti-guztiak" berretsi egin ditu tokiko erakundeak. Beraz, diskoteka ezin izango dute zabaldu behar diren baimenak lortu arte. Hala ere, horren sustatzaileek baimenak eskatuta dituztela aitortu dute udal arduradunek. Gaur goizean izandako bileran, jardueraren bultzatzaileek Gabon Zahar gauean kotilioia ospatzeko "erabilpen puntual posiblea" egitea planteatu dute, tokiko erakundetik jakinarazi dutenez. "Hori, 700 pertsona baino gehiagorentzat egitea aipatu dutenez, baimena ez dagokio Udalari, baizik eta Eusko Jaurlaritzaren Herrizaingoko Joko eta Ikuskizunetako Zuzendaritzari, bere eskuduntza delako", azaldu dutenez. Argazkian, Getxoko Kirol Portua gauez / cc-by-nc-sa gazskoin.
Quality dantzalekuko sustatzaileek beraien buruak "babesgabe" ikusi zituzten joan den ostiralean, "Udal Prentsa Bulegoak prentsa oharra 15:00ak igarota igorri zielako hedabideei eta, hori horrela izanda, bertan agertutakoa Getxoko Udalarekin argitzeko aukerarik ez zegoelako astelehenera (gaur) arte". Idatzi berean, "proiektuak hasiera-hasieratik Getxoko Udal Txit Gorenaren babesa" izan duela aipatu zuten diskotekako bultzatzaileek; baita urte hasieran egitasmoa aurkeztu zitzaienetik hona tokiko erakundearen "milioi bat euro baino gehiagoko inbertsioa" ere. Baimenei dagokienez, gaia Udalarekin biltzeko aukera zutenean argituko zutela adierazi zuten Quality-koek. Obra eta jarduerarako lizentzien tokiko erakundeak esandakoa, ordea, ez zuten gezurtatu. Azkenik, beraien blogean "udal marka korporatiboa modu okerrean eta baimenik gabe" erabiltzea leporatu zien Udalak. Hori, baina, "azaroaren bukaeran bere burua udal langile bezala aurkeztu zuen andre batekin" argitu zutela azaldu zuten sustatzaileek: aipatu bloga beraiena ez zela eta horren jatorria ezagutzen ez zutela esan omen zieten tokiko erakundeko arduradunei.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun