Bestalde, hilaren 16ko zineklubak “Agua con sal” izenburuko pelikularen proiekzioa eskainiko du, 21:00etan, Areetako Andres Isasi Musika Eskolan. Horrek laneko esplotazioak eta diskriminazioak elkartutako emakume espainiar baten eta kubatar baten istorioak kontatzen ditu. Hilaren 12tik 19ra, berriz, “Muga ikusezinak” argazki erakusketa ikusi ahal izango da Villamonteko kultur aretoan, Algortan. Bitartean, Jabekuntza Eskolarekin elkarlanean antolatutako saioak kultur-artekotasuna, integrazioa eta elkarbizitza izango ditu mintzagai eta Atzerritartasun Legeari buruzko informazio saioa hilaren 21era aurreratuko da. 19:00etan izango da, Villamonteko kultur aretoan. Azkenik, urtarrilaren 7tik martxoaren 24ra bitartean irrati tailerra izango da, 18 urtetik gorako pertsonari zuzenduta, "aniztasun kultura handiko taldeetan lan egin eta gaurkotasun handiko giza eta kultura arazoei heldu nahi dietenentzat".
Tailerra eta eztabaida gunea
Marco Ramirez Getxoko Etorkinak plataformako presidenteak "Etorkizuna" izeneko tailerra edo eztabaida gunea aurkeztu zuen asteleheneko prentsaurrekoan. Hori abenduaren 17an izango da Algortako Gaztelekuan, 11:00etatik 14:00etara. Horrekin batera hilaren 18rako, iganderako, Kultur-arteko jaia (12:00etatik aurrera, Algortako Telletxe plazan) ere antolatu dutela gaineratu zuen. “Dantzak, musika, janaria, tailerrak eta oroitzapenezko adierazpen bat irakurriko dugu. Gainera performance bat egiten saiatuko gara eta horretarako hurbiltzen direnei maleta bat ekartzea eskatu nahi diegu, denok migranteak izan garela, garela eta izango garela erakusteko, kulturarteko gizartearen aldeko apustua egiten dugula adierazteko, denok eskubideen berdintasunean parte hartuz”, azpimarratu zuen Marco Ramirezek.
Abenduaren 18ko Etorkinen Nazioarteko Egunaren inguruan hainbat jarduera egingo dituzte Getxon
Jatorri desberdineko auzokide guztien arteko topaketa eta hausnarketarako gunea eskaintzeko helburuarekin, beste urte batez jarduerak antolatu dituzte Getxoko Udalak eta Getxoko Etorkinak plataformak. Izan ere, abenduaren 18an izango da Migratzaileen Nazioarteko Eguna. Ekimenen artean, Immigrazioaren eta Elkarbizitzaren inguruko Mintegia azpimarratu zuen asteleheneko prentsaurrekoan Elena Coria Gizarte Zerbitzuetako zinegotziak. “Getxoko eta Euskadiko elkarbizitzaren eta dibertsitatearen inguruko azken azterketa akademikoetara hurbiltzeko aukera izango da. Hain zuzen ere, honako hauek aztertuko dira: Getxoko immigrazioaren urteko panoramika Xabier Aierdi soziologo eta EHUko irakaslearen eskutik; Pertzepzio Barometroa Getxoko herritarrek bertako immigrazioaren inguruan dituzten pertzepzio eta jarreren gainean, Jose Oleaga soziologo eta EHUko irakaslearen eskutik; eta 2010eko Euskadiko Biztanleria immigrantearen inkestaren ondorioak Gorka Moreno Ikuspegi behatokiko zuzendariaren eskutik”, udal arduradunak zehaztu zuenez. Mintegia hilaren 15ean egingo dute, 18:00etatik aurrera, Itzubaltzeta / Romoko Gobelaurre Boluntariotza Zentroan. Izen-ematea zabalik dago jada eta www.getxo.net web gunearen bidez edo udalerriko herritarren arretarako bulegoetan egin dezakete interesatuek. Argazkian, astelehenean aurkeztu zituzten ekitaldiak Elena Coria Gizarte Zerbitzuetako zinegotziak, Imanol Landa alkateak eta Marco Ramirez Getxoko Etorkinak plataformako presidenteak / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun