Asteazkenean egingo duten isuri toxiko simulazioaren sirenak eskualdean ere entzungo dira
Eusko Jaurlaritzaren Herrizaingo Sailak larrialdi kimikoetarako sirenak aktibatuko ditu datorren astean Arabako, Bizkaiko eta Gipuzkoako hainbat herritan simulazioak egiteko. Helburu nagusia, herritarrek isuri toxikoren bat izanez gero nola jardun behar duten barneratzea da, azpimarratu dutenez. Abenduaren 13a eta 16a artean egingo dira simulazioak, Lantaronen (Araba), Hernanin (Gipuzkoa) eta Alonsotegi, Gueñes, Muskiz, Abanto Zierbena, Zierbena eta Santurtzin (Bizkaia). Hain zuzen ere, asteazkenean, hilak 4, Santurtzin, Bilboko Portuan, piztuko dituzte sirenak, 12:30ean. Eta horiek Getxo udalerrian ere entzun ahal izango direla ohartarazi du Herrizaingo Sailak. Azaldu dutenez, simulazioek irauten duten bitartean sirenek uhindun seinalea igorriko dute laino toxikoaz ohartarazteko eta 30 segundo iraungo duen beste seinale lau batek, berriz, alarma amaitu dela adieraziko du. Argazkian, Santurtziko portua / cc-by Iker Merodio.
Sirenen helburu nagusia larrialdi une bat izanez gero berehalako alerta lortzea da, herritarrek horrelako istripu baten aurrean hartu beharreko neurriak martxan jartzeko. Halaber, Herrizaingo Sailak industria kimikoa dagoen inguruetan informazio kanpainak egin ohi ditu herritarrek nola jardun behar duten jakiteko. Hala, Eusko Jaurlaritzak gogorarazi duenez, laino toxikoren bat sortuz gero, alerta ohartarazten duen sirena entzun bezain pronto ateak eta leihoak itxi behar dituzte herritarrek eta ondoren, horietatik aldendu. Horrez gain, ez da berogailu edo aireztapen sistemarik erabili behar eta kalean egonez gero toki itxi batera jo behar da. Gainera, ezin da erre, ezin da surik piztu, eta telefonoa derrigorrezkoa bada soilik erabili behar da. Halaber, ez da eskolara haurren bila joan behar, irakasleak arduratuko dira beraiez, eta alerta amaitu dela iragarri arte ezin izango da kalera irten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun