Fauna Basatia Sendatzeko Gorlizko Zentroan egon diren zortzi sai arre Balkanetan askatuko dituzte hemendik gutxira. Errepidez hiru eguneko bidaia egin ondoren, animaliok —Bizkaiko Foru Aldundiko Nekazaritza Sailaren laguntza duen Life programaren barruan daudenak— orain astebete heldu ziren beren jomugara: Bulgariako beste zentro batera. Han, zain daude Bizkaiko naturatik urrun aska ditzaten; esan bezala, Balkanetan. Saiak bat eta bi hilabete artean eman dute Gorlizko foru instalazioetan. Batzuk gaixotasunetatik sendatu behar ziren; beste batzuk, ordea, egokitzeko arazoak zituzten kumeak ziren. Osasun-dokumentazio guztia eguneratuta eta txipa jarrita, errepidez hiru eguneko bidaia egin zuten, furgoneta berezi batean. Sei ordurik behin gelditzen ziren animalien egoera ona bermatzeko, foru iturriek nabarmendu dutenez. Osasun egoera onean heldu ondoren, hamabost egunetan egon behar dute zain. Gero, askatzea bideragarria dela ikusten denean, naturan utziko dituzte. Argazkia: © Bizkaiko Foru Aldundia.
Hau ez da Bizkaiko Foru Aldundiaren Nekazaritza Sailak Europako proiektuetan laguntza ematen duen lehenengo aldia. Orain hiru urte, antzeko jarduera bat egin zen: hamaika hegazti nekrofago askatu zituzten Italian eta bost Jaenen. Nekazaritzako Foru Sailak adierazi du asmoa duela antzeko proiektuetan parte hartzen jarraitzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun