Bihar, asteartea, lanuzte egun berri bati aurre egin beharko dio Metro Bilbao garraio enpresak. Geldialdiak 9:45etik 12:45era izango dira. 11:00etan, berriz, prentsaurrekoa eta elkarretaratzea egingo dituzte langileek Bilboko Nafarroa kaleko bulegoen aurrean. Hilaren 7an Lan Harremanen Kontseiluan (LHK), Precon, izandako bileraren ostean, zuzendaritzaren jarrera salatu zuen greba batzordeak: "negoziatzaile ageri dira, baina akordioak lortzeko, irtenbide bat bilatzeko benetako foroetan auzia gaiztotu besterik ez dute egiten, jarrera zurrunekin". Beharginen ordezkariek aipatu dutenez, "tentsio handiko bileran, 9:30ean hasita, greba batzordeak kontziliazio eskaintza jarri zuen mahai gainean, LHKko pertsona bat zuzendaritzaren eta sindikatuen arteko bilera guztietan egoteko, bi alderdien arteko harremanak eta akordioa erraztera begira". Hala ere, langileen hitzetan, "alferrik. Zuzendaritzak uko egin zion langileen ordezkarien proposamenari. Hartara, indarrean da oraindik hilaren 21eko Santo Tomas egunerako 24 orduko greba deialdia. Bestalde, gutxieneko zerbitzuak ezarri ditu biharko Metro Bilbaok. Argazkian, azaroaren 11n Basauriko geltoki parean egin zuten prentsaurrekoa eta elkarretaratzea Metro Bilbaoko langileek / © LAB Metro Bilbao.
Greba batzordearen arabera, "zuzendaritzak arbitrajea baino ez du nahi, eta lantaldearen auziari buruz soilik gainera; antentze-arloaren berregituratzea, Gabon Gaueko tren-zerbitzua eta 2012rakoa, eta lan-murrizketak betetzea alboratuta". Hori dela eta, Iñaki Prego kontseilari ordezkariari leporatu diote "inposizioetan oinarritu eta negoziatzetik urruntzen den estrategiarekin auzia luzatzea". "Iñaki Prego eta bere jarrera totalitarioa dira abenduaren 13ko eta 21eko greba-deialdien erantzule zuzenak", amaitu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun