Berdintasun formalaren garaia da: Erakundeek hainbat ekimen eta plan abiatzen dute, baina benetako eraldaketaren aldeko neurriak al dira? Nolabaiteko konpromisoa dagoela helarazi nahi dute, baina, abenduaren 3ko erasoak eta komunikabideetan egunero ikusten ditugun berriek erakusten dute berdintasun hori ez dela benetakoa. Beraz, ezinbestekoa da emakume eta gizonen arteko parekidetasunaren aldarrikapen hutsetik haratago joatea: parekidetasuna guztiok barneratzen eta gauzatzen dugun konpromisoa da, ala ez da sekula izango.
Garai berria zabaldu da Euskal Herrian, baina euskal emakumeon egoera bere horretan dago. Emakumeok pairatzen dugun indarkeria, jendartearen eremu guztietan sufritzen dugun diskriminazioaren ondorio latzena izanik, jendarte patriarkalaren oinarrian dagoen botere erlazioen adierazlerik latzena da.
Euskal Herrian eraldaketa politiko eta soziala gauzatzeko prozesuaren garapenak jauzi berri eta kualitatiboa ekarriko du gure herriaren askapen prozesuan. Emakumeok eraldaketaren ezinbesteko eragile gara, eta, horrenbestez, eraldaketan eragin behar dugu. Eta, noski, eraldaketa horretan, emakumeon kontrako indarkeriari aurre egitea ezinbestekoa da.
Bide horretan, Ezker Abertzaleko kideok emakumeon zapalkuntzari aurre egiteko konpromisoa berresten dugu, duela urte batzuk mugimendu feministak adostu Euskal emakumeon eskubideen karta oinarri. Gure proiektua oinarri feministetan sortu eta eraiki nahi dugu, mugimendu feministari dagokion papera aitortuz eta prozesu demokratikoan emakumeon kontrako indarkeriari aurre egiteko bitartekoak ere exijituz. Geure bizibaldintzak hobetzeko bidea marraztu eta hartu behar dugu.
Bide horretan, herrigintzan bezala, instituzioetan ere hartutako konpromiso horri tinko helduko diogu, politikoki zuzena den mezu hutsalari aurre eginez eta benetan eraldatzaileak izango diren politika feministak erdietsi eta aplikatzeko lanari ekinez.
Horregatik, bihar, abenduaren 13an, emakumeon kontrako indarkeriari aurre egiteko beste urrats bat eman behar dugu kalean, mugimendu feministak antolatu mobilizazioan parte hartuz. Beraz, bat egiten dugu Bilgune Feministak eta Andrak elkarteak Bulebarrean 19:00etarako deitu duten elkarretaratzearekin.
Abenduaren 13an altxa gaitezen! 19:00etan Bulebarrera!
Leioako Ezker Abertzalea
Leioako Ezker Abertzalea: "Emakumeon kontrako indarkeriari aurre egin, erasorik ez!"
Abenduaren 3an emakume bat erasotu zuen gizon batek Leioan. Emakumeok egunero eta bizitzako esparru guztietan pairatzen dugu sistema patriarkalaren ondorio larriena: indarkeria matxista; eta, oraingoan, are larriagoa izan da erasoa, ume baten aurka izan da eta. Emakumeon kontrako indarkeria egiturazkoa da, jendartean pairatzen dugun gutxiestetik eratorria. Arazo larri hori gainditzeko gakoa da jendarte berri bat sortzea, gizon eta emakumeon arteko harremanak parekidetasunean eraikiz, emakumeok bizi dugun zapalkuntzari guztiok elkarrekin aurre eginez. Emakumeok beldurrik gabe bizitzeko eskubide daukagu: kalean, lanean, ikastetxean, etxean etab. Baina eskubide hori gauzatu egin behar dugu, denon artean. Izan ere, emakumeon eskubideak formalki aitortzen badituzte ere, egunerokoan eskubide horiek urratzen dituzte, eremu guztietan; indarkeria fisikoa da urraketa horien adierazlerik larriena. Argazkian, hainbat gizon-emakume azaroaren 25eko elkarretaratze batean Leioan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun