Prebentzio neurriak
Eusko Jaurlaritzak une honetan haizeagatik eta itsasertzeko arriskuagatik alerta horia aktibatuta duela eta, honako gomendio hauek egin ditu:
• Ez bainatu ezagutzen ez dituzunetan edo zaintza eta salbamenduko zerbitzurik ez daukaten hondartzetan.
• Ez bainatu olatu handiak dauden tokietan.
• Urrundu olatuak lehertzen diren lekuetatik (haitz, kai-mutur, moila…).
• Urrundu hondartzatik eta haize handiaren eraginez sor daitezkeen marea eta olatu handien kolpea jasotzen duten lekuetatik.
• Ez hurbildu itsas pasealeku, kai-mutur edo itsas labarretara. Uraren indar handiak eraman egin zaitzake.
• Ez joan ibilgailuz kostako errepideetan.
• Urpekaritza egitekoa bazinen, utzi beste baterako.
• Saiatu itsasontzirik ez erabiltzen eta berrikusi amarrak. Inola ere ez, ez egin uretako kirolik.
• Itsasora erortzen bazara, urrundu olatuak lehertzen diren lekutik, laguntza eskatu eta itxoin erreskatatu arte.
• Olatuek eramaten bazaituzte, lasai egon, eta ez egin igeri korrontearen kontra; kostako korronteek indarra galtzen dute tarte batzuetan.
Era berean, haize zakarren arriskuaren aurrean:
• Ate, leiho eta toldoak itxi eta ondo tinkatu.
• Kendu lorontziak eta kalera eror daitezkeen gauza guztiak.
• Aldamio, garabi eta obrako beste elementuak tinkatu.
Kanpoan egotekotan:
• Urrundu erlaitz, murru, zuhaitz edo publizitate-hesietatik, eta kontuz ibili egiten ari diren etxeen edo kolokan dauden eraikinen aurretik.
• Saiatu errepidez ez bidaiatzen, bestela, kontu handiz jokatu beti.
• Aurretik, jakinaren gainean egon zer-nolako eguraldia izango den zu zoazen leku horretan edo pasako dituzun lekuetan.
Larrialdietan, 112 zenbakira edo Getxoko Udaleko Larrialdietako Koordinazio Gunera 944 660 202 eta 944 660 112 telefonoetara deitu.
Algortako Ereaga hondartzako pasealeku osoa itxiko du 16:00etatik aurrera ibilgailu zein pertsona ororentzat Getxoko Udalak, Eusko Jaurlaritzak gaur bertan itsasaldeko arriskuagatik emandako alerta laranja dela eta. Iragarpenaren arabera, 5 eta 6 metro arteko olatuak izango dira eta arratsaldeak aurrera egin ahala 6 eta 7 metro artera irits daitezke. Goizaldean hortik gorakoak izan daitezke, udal iturriek zehaztu dutenez. Horregatik, gauerditik aurrera alerta gorria izango da. Ereagako pasealeku osoa itxiko dute eta, hortaz, Kirol Portua, hondartza eta Portu Zaharra zarratuta egongo dira muturreko baldintza meteorologiko horiek gutxitzen diren arte. Tokiko arduradunek arrisku tokietatik hurbil dauden saltoki, taberna, jatetxe eta hotelei egoeraren aurrean hartu beharreko prebentzio neurriak jakinarazi dizkiete jada. Argazkian, 2009ko urtarrilaren 24an, zikloi batek jota, Sapaburu itsas-ontzia hondoratu zen Areetako Bola hondartzaren ondoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun