Klaustro berriaren aurrean murrizketak salatuko dituzte bihar EHUko ikasle erakunde eta sindikatuek
EHUko ikasle erakunde eta sindikatuek "desadostasuna eta arbuioa" agertu zuten, joan den azaroaren 30ean, 2012rako Euskal Autonomia Erkidegoko aurrekontu proiektuak aurreikusten zituen murrizketen aurrean. Ildo berean, Eusko Jaurlaritzaren Hezkuntza Sailari eta Unibertsitateari eskatu zieten, murrizketa neurri horien eraginak azaltzeko; baita "konpromiso argiak" hartzeko ere, "ikasteko eskubidea eta EHUko langileen eskubide laboralak bermatzeko". Orain, "eskubide horiek guztiak bermatzeko instituzioek agertu duten konpromiso eza ikusita", biharko, kontzentrazioa deitzea erabaki dute Ikasle Abertzaleak, Ikasle Kontseilua, Lurgorri, ELA, CCOO, EILAS, LAB, UGT eta CSI-CSIF erakundeek. Elkarretaratzea goizeko 9:30ean egingo dute, Bilboko Paraninfo aurrean (Abandoibarra, 3), “Celaa, Goirizelaia. Murrizketarik ez EHUn” lelopean. Izan ere, bertan egingo du lehendabiziko bilera azaroaren 22ko hauteskundeetan aukeratutako Klaustroak. Argazkian, hainbat fakultate Leioa eta Erandioko campusean.
"Unibertsitatearekin eta Hezkuntza Sailarekin bildu ondoren erakunde guztion balorazio mankomuna da, bai Hezkuntza Sailak, bai Unibertsitateak, ez dituztela hartu nahi gure aldetik eskatu dizkiegun konpromisoak, horiek betetzea EAEko 2012ko aurrekontu Legean agertuko diren (abenduaren bukaeran ziurrenik) behin-betiko zenbaki eta neurrien zehaztapenetara baldintzatuz", azaldu dute EHUko ikasle erakunde eta sindikatuek. Halaber, 2012ko lehen hiruhilabetekoan "presio neurri sendoagoak" hartzea ez dute baztertzen, "sumatzen dugun murrizketa politika hau azkenean benetan gauzatzen bada".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun