Berangoko Kultur Arloak "Ostiral musikalak" zikloa abian izango du, hilabete bakoitzeko hirugarren ostiralean, 19:00etatik aurrera; Berangoetako kultur etxean ikus-entzunezko proiekzioa eskaintzea helburu duen ekimena. Mundu osoan izandako emanaldirik bikainenetako batzuk hartuko ditu zikloak, musika maite duten berangoztarrek osatutako Grupo Pro Music taldeari esker. Eurak arduratuko dira kontzertuaren aurkezpena egiteaz eta, behin ikusita, solasaldia ere izango da. Lehenengo hitzordua abenduaren 16an izango da; urte berriari ongi etorria emateko gala, alegia. Ondokoak izango dira: Georges Bizet-en "Carmen" operaren tarterik onenak; Sergei Rachmaninov-en Rapsodia Paganiniren gai baten inguruan, piano eta orkestrarako; Pablo Sarasateren "Fantasie du concert sur Carmen de Bizet, Op.25", biolin eta orkestrarako; eta Johannes Brahms-en 5. Dantza Hungaria orkestrarako, Berlineko Orkestra Filarmonikoaren eskutik, Claudio Abbadok zuzenduta eta Donostiako Orfeoiaren parte hartzearekin. Argazkian, musika klasiko emanaldi bat / © Schubert Ensemble.
Urtarrilaren 20rako "2000ko Europar Kontzertua" prestatzen dabiltza. Ludwig Van Beethovenen do minorreko bederatzigarren sinfonia eskainiko da. Claudio Abbadok zuzenduta, Berlingo Orkestra Filarmonikoak bakarlariekin eta Suediako Irratiko abesbatzarekin emandako kontzertua izan da aukeratua. "Abesbatza handiak zein bakarlari eta orkestra ospetsuak izango dira protagonistak, musika sinfoniko, zarzuela edota opera onenez gozatzeko asmoz. Euskal musikari eta konpositore zein zuzendari hoberenei ere tartea egingo zaie", azaldu dute udal iturriek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun