"Ahalik eta herritar gehienen partaidetzarekin" sustatu nahi ditu 2012ko aurrekontuak Sopelako Udalak. "Guztiok jakin badakigu egoera ekonomikoaren larriaz, baina horregatik hain zuzen, zailtasunen gainetik, nahi dugu, ahalik eta erarik komunean, 2012ko aurrekontuak adostu, herritar guztion ekarpenak, iritziak eta balorazioak aintzat hartuz", azaldu du Bilduk osatzen duen Gobernu Taldeko iturriek. Horretarako, "logikoa eta behar beharrezkotzat" jo dute, tokiko erakundean ordezkaritza duten alderdien arteko negoziaketez gain —azken finean hauek osatuko baitute udalbatzaren gehiengoa aurrekontuak onartzeko edo ez—, Udalak berak partaidetza prozesua antolatzea sopeloztar guztion ekarpenak eta iritziak jasotzeko. Horren barruan, hainbat informazio bilera ireki izango dira herritar guztiek parte hartzeko aukera izan dezaten. Batzarrak Larrabasterran, Sopelako herriko gunean, eta kostaldean (Sopelmarren eta Arriateran) egingo dituzte. Horretaz gain, inkesta bat ere banatuko zaie bizilagunei, "herrian dauden edota aurreikusten diren zenbait egitasmoei buruzko interesa eta lehentasuna adieraz ditzaten". Argazkian, zabaltzen ari diren kartela.
Azkenik, jadanik hitz egiten ari da herriko talde, elkarte, giza eragileekin eta Udal hauteskundeetan ordezkaritza izan ez zuten alderdiekin. "Sopelako Udal Gobernu Taldeak azaroan bultzatu nahi izan zuen partaidetza prozesua, aurrekontuen tramitazioa eta onarpena aurreratzeko; baina abenduan burutzen ari da, ez baitzen egokia ikusi partaidetza prozesuak eta hauteskundeen kanpainak bat egitea", zehaztu dute Bildukoek.
Batzar informatiboak:
- Larrabasterran: abenduaren 19an, astelehena, 19:00etan Iberreko institutuan.
- Sopelako herrigunean: abenduaren 20an, asteartea, 19:00etan udaletxeko sarreran.
- Sopelmarren: urtarrilaren 10ean, asteartea, 19.00etan.
- Arriateran: urtarrilaren 11ean, asteazkena, 19:00etan.
- Orokorra: urtarrilaren 20an, ostirala, Kurtzio Kultur Etxean.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.