Jaurlaritzak %70eko gutxieneko zerbitzuak ezarri ditu metroan San Tomas egunerako
Asteazkeneko San Tomas egunerako Metro Bilbaoko langileek deitutako grebarako gutxieneko zerbitzuak ezarri ditu jada Eusko Jaurlaritzak. Horien arabera, ohiko zerbitzuaren %70 eskainiko dute 12:00etatik 14:00ak arte eta 20:00etatik 22:00ak arte. Egunaren gainontzeko orduetan, %60ko zerbitzua bermatu dute. Bestalde, Metro Bilbaoko ordezkari sindikalek iragarri dutenez, ezarritako zerbitzu minimoen aurkako helegitea aurkeztuko dute, beraien esanetan, "neurriz kanpokoak" direlako. Rafa Valencia enpresa batzordeko presidenteak esan duenez, Eusko Jaurlaritzak zehaztutako zerbitzuak "guztiz abusuzkoak dira". Metro Bilbaoko sindikatuek diotenez, zerbitzu minimoak %30ean kokatuta, "funtsezko zerbitzua bermatzeko nahikoa da". Gogoratu, Patxi Lopez lehendakariak asteazkenean aipatu zuela "bitarteko guztiak erabiltzeko" agindu diola Herrizaingo sailburuari, "metroko sabotajeak eta mehatxuak galarazteko". Argazkian, hiru orduko lanuztearen barruan, prentsaurrekoa eta elkarretaratzea egin zituzten asteartean metroko langileek / © LAB Metro Bilbao.
Enplegu eta Gizarte Gaietarako Sailak astelehen honetan iragarri duenez, bezeroarekiko arreta bulegoetan ohiko zerbitzuaren %50 eskainiko dute eta trenen maiztasuna ezagutzeko panelak jarriko dituzte geltokietan. Halaber, Basauri, Etxebarri, Bolueta, Santutxu, Zazpi Kaleak, Abando, Moyua, Indautxu, San Mames, Deustu, San Inazio, Gurutzeta, Barakaldo, Sestao, Portugalete, Santurtzi, Leioa, Areeta, Algorta, Bidezabal, Ibarbengoa-Getxo, Larrabasterra, Sopela, Urduliz eta Plentzia geltokietan balizko intzidentziei aurre egiteko langile bana izango da. Geltokien barnean bidarien mugikortasuna kudeatzen duten bi langile izango dira goizeko txandan eta hiru arratsaldeko txandan. Azkenik, zerbitzu minimoak ezin direla "oztopatu" dio Eusko Jaurlaritzak, hura egitea "legezkoa ez" delako.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun