Herritarren parte-hartzerik gabeko proiektu erraldoirik ez du onartuko Getxoko Bilduk
Getxoko Bilduk parte-hartze prozesua abian izan du azaroan eta abenduan zehar, aurrekontuen inguruan herriko elkarte eta eragileen iritzia eta proposamenak jasotzeko. Maitane Nerekan eta Bingen Saitua zinegotziek azaldu dutenez, arlo ezberdinetan lan egiten duten 30 eragilerekin (euskalgintza, auzo elkarteak, feministak, gazteak, sindikatuak, komunikabideak, etorkinak, eta abar) egon dira, bost bileretan. Horiek 100 proposamen baino gehiago luzatu dizkiete. Gaur egun, jasotako proposamenak aztertzen ari dira: "horietatik premiazkoentzat jotzen ditugunak Bilduren herri-programakoekin uztartu eta EAJri eramango dizkiogu. Badakigu eramango ditugun proposamenak gauzatzeko aukerak badaudela, horiek diru-partida ezberdinetan islatuz; hori da, hain zuzen ere, EAJri helaraziko diogun mezua, eta horregatik hitz egiteko prest agertu gara hasieratik", azaldu dute koaliziokoek. Hala ere, beraien hitzetan, horrek "ez du esan nahi inolako aurrekontu proposamenari baiezkoa" emango diotenik: "Euskal Herri osoan egin bezala, Getxoko Bilduk ez du herriarekin kontatu gabe aurrera eramandako makroproiekturik onartuko. Itzubaltzeta / Romoko Kultur Etxearen —aipatu herrian egin dute agerraldia— zein Getxo Antzokiaren kasuan, benetako parte-hartze prozesuak martxan jartzea exijituko dugu, falta diren faseak esleitu aurretik", ohartarazi dutenez. Argazkian, Saitua eta Nerekan gaurko prentsaurrekoan.
Getxoko Bilduk urrian publiko egin zuen EAJk zergak eta tasak eta aurrekontuak negoziatzeko egindako proposamenari baiezkoa eman ziola. Urriko udal batzarrean onartu zituzten lau zerga eta, horren ostean, gainontzeko tasak zein aurrekontu osoa negoziatzera esertzea "exijitu" zieten jelkideei. Nerekanek eta Saituak gaur adierazi dutenez, EAJk bere aurrekontu proposamena luzatu die jada eta hori sozializatzen lan egingo dute datozen asteotan. Bestalde, Getxoko Bilduk "oso positiboki" baloratu du herriko eragileekin izandako hartu-emana: "argi geratu zaigu aurrekontuei buruz ere getxoztarrek asko daukatela esateko, eta beraien herriaren eraikuntzan parte hartzeko gogoz daudela", aipatu dutenez. Horri jarraiki, "ezelako aurrekontu proposamenari baiezkoa emateko asmorik ez" dutela ziurtatu dute: "Getxo Bildutik mandatu moduan sentitzen dugu herri eragileek egindako proposamenak EAJrekin mantentzen ari garen negoziaketan defendatzea, udalgintza gardenago, parte-hartzaileago,abertzaleago eta ezkertzaleago baten bidean", azaldu dutenez. Horrez gain, "argi" daukate koaliziokoek "bizi dugun krisi ekonomikoa gehien pairatzen dutenei lagundu ahal izateko, gastu sozialetan egindako inbertsioak nabarmen indartu behar direla Getxon". "Hori ere exijituko dugu", amaitu dute Bildukoek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun