Getxolandian ohi denez, Areetako atrakzio eta simulagailuen gunea 2.500 metro koadroko karpa batekin estali da, metroko sarreraren ondoan. Horrela, "eguraldia lagun izan ez arren, parkearen funtzionamendu egokia bermatuta dago", Kultur Etxeko kideek argitu dutenez. Bertan, 2 eta 16 urte arteko neska-mutikoek honako atrakzio hauetaz gozatzeko aukera dute: zaldiko-maldikoak, ohe elastikoak, dragoiak, karrusela, auto-txokeak, noria eta 1 eta 2 urte arteko haurtxoentzako ludoteka.
Halaber, 8 eta 16 urte arteko erabiltzaileak erakartzeko asmoz, aurten zortzi simulagailu hartu ditu parkeak Areetan ere. Horrezaz gain, hainbat joko ere dira bertan: mahai-futbola, ping-pong eta aire mahaiak, dantza eta karaoke makinak eta Wii jokoak. Atrakzio, simulagailu eta joko gunearen sarrera 3,50 eurokoa da eta txartel bakoitzak 6 bidaia egiteko balio du.
Bestalde, Algortako Biotz Alai plazan adin guztietako lagunek 600 metro koadroko izotz gaineko patinaje pistaz gozatu ahal izango dute. 45 minutuko saioa 3,50 euro balio du eta prezioak patinaje egiteko ekipamendu guztia barne hartzen du.
Egutegi eta ordutegia
Areetako atrakzio-gunea urtarrilaren 5era egongo da zabalik. Horren ordutegia honako hau da: 11:00etatik 14:00etara eta 17:00etatik 21:00etara, abenduaren 24an eta 31n eta urtarrilaren 5ean izan ezik, horietan ordubete lehenago itxiko baita arratsaldean. Abenduaren 25ean eta urtarrilaren 1ean itxita egongo da.
Izotz-pistari dagokionez, hilaren 17an zabaldu zuten eta urtarrilaren 9ra egongo da zabalik. Atrakzio-gunearen ordutegi bera izango du, gaur salbu, arratsaldez baino ez da irekiko eta. Abenduaren 24an eta 31n eta urtarrilaren 5ean ordubete lehenago itxiko da eta abenduaren 25ean eta urtarrilaren 1ean eta 6an itxita egongo da.
Aurten, lehenengo aldiz, umeen zein guraso euskaldunen hizkuntz eskubideak bermatuko ditu Getxolandia Gabonetako parkeak. Izan ere, 25 urte eman dituzte gurasoek umeen itzultzaile lanak egiten: barraketako langileen aurrean, lehenengo, eta Kultur Etxeko hainbat begiraleren aurrean, ondoren. Halere, iaz arte ez zen horren kritika herrian zabaldu. Hilaren 17an eta atzo abiatu zen Getxolandiako 26. edizioa Areetako Xake plazan zein Algortako Biotz Alai plazan, hurrenez hurren. Toki bietan sendiak hartzen diharduten begirale guztiak euskaldunak dira. Getxoko Kultur Etxeak plazaratutako behin-behineko lanpostuetarako zenbait hautagaik UKBERRI.NETi adierazi dionez, Udalak Europako B-2 mailaren agiri baliokideak eskatu dizkie, HABEren 2. maila kasu. Titulurik ez zutenei ahozko probak egin zizkieten. Argazkian, umeak ondo pasatzen aurreko edizio batean / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun