Sopelako EAJk PP eta PSE-EErekin bat egin du Ion Etxegarairen aldeko mozioa atzera botatzeko
Aste hasieran zabaldutako epaiaren bidez, Ion Etxegarai Begoñari bi urteko espetxe zigorra ezarri dio Espainiako Auzitegi Nazionalak. Sopelako Udalbatzak, ordea, ez zuen atzoko bilkuran Bilduk bere herrikidearen alde aurkeztutako mozioa onartu. EAJk, PSE-EEk eta PPk botoak batu zituzten proposamena atzera botatzeko. Mozioan argudiatu dutenez, Etxegarairi leporatzen dizkioten karguak "orain dela 10 urtekoak" dira eta, epaileetariko batek, Ricardo de Pradak, onartu egin du boto partikularra emanez, "ekintza horiek preskribituta" daudela. Are gehiago, "epaitutako ekintzak ez direla, duten izaeragatik eta helburuengatik terrorismo ekintzatzat hartu behar". "Honez gain, 10 urte hauetan Ionek bizi, ikasi eta lan egin du Sopelan egunero normaltasun osoz", zinegotzi independentistek nabarmendu dutenez. 2010eko azaroaren 24an atxilotu zuten Etxegarai, bere kabuz epailearengana aurkeztera zihoanean. Handik lau hilabetera, martxoaren 30ean, askatu zuten, 20.000 euroko fidantza ordaindu ondoren. 2002ko martxoaren 15ean Algortako Iturgitxi kaleko La Caixaren kutxazain batean lehergailu bat jartzea leporatuta, bi urteko espetxe zigorra eta 17.199 euroko kalte-ordaina ezarri dizkiote gazte sopeloztarrari. Argazkian, Etxegarai atxilotu zuten egunean auzokideek egindako manifestazioa.
Mozioan eskatzen zen Sopelako Udalak bat egitea "ideologia eta jatorri askotako eragileak egiten ari diren eskaerekin, Euskal Herrian zabaldu den agertoki politiko berria sustatzeko eta Espainiako eta Frantziako Estatuek ekarpen positiboak egin ditzaten". Ildo horretan, Ion Etxegarai Begoñari ezarritako bi urteko kartzela aldiak "beharrezkoa den norabidean ez du laguntzen", Bilduren istez; "eta jadanik agortua eta guztion borondatez gainditu behar den agertokian kokatzen gaitu". Zinegotzi independentistek azaldu dutenez, "PSOEk ez zuen inolako argudiorik eman, ezetza bozkatu zuen; PPk esan zuen Ionek ez badu sententzia onartzen 'errekurritzeko aukera duela' eta PNVk 'ebazpen judizial baten kontra ez direla joango' jakinarazi zuen eta beraz bat egin zuen PSOE eta PPrekin mozioa aurrera atera ez zedin gauzatuz".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun