Horretaz gain, Sabino Arana Fundazioko arduradunek nabarmendu dute “munduko onena bihurtzeko izan dituen ilusio, motibazio eta borrokak bere karreran zehar ikurrina planetako bazter guztietan harro paseatzera eraman dutela”. “Ezbairik gabe, Bizkaiarentzat eta Euskadirentzat harro sentitzekoa da IBA Tour zirkuituan ohol gaineko halako txapeldun iaio bat edukitzea, aldi berean tarte bat egin duelarik hain kirol tekniko eta zehatz honetan”, azpimarratu dute.
Donostiako Nazioarteko Bake Konferentziak, Deustuko Unibertsitateak, Bilboko Merkataritza Ganberak, Maite Lafourcade irakasleak eta CAF enpresak ez ezik, Eunate Agirre bodyboardlari sopeloztarrak ere jasoko du 2011ko Sabino Arana Fundazioaren saria. Garaikurrak banatzeko ekitaldia urtarrilaren 29an, igandea, egingo dute Bilboko Arriaga Antzokian, 12:00etan. Aipatu elkarteak Agirreren "kemena, ahalegina, ardura eta hobetzeko grina” goretsi nahi ditu, "tasun horiek eraman baitute espezialitate horretako munduko txapelketa lortzera, hiru urtean jardun ostean mundu osoko emakumeen rankineko elitean". Dagoeneko 2011ko Bizkaiko kirolari onena hautatu du Bizkaiko Kirol Prentsa Elkarteak kirolari sopeloztarra. Agirrek bodyboard munduko txapela jantzi zuen azaroaren 27an Azoreetan. Argazkia: © Sabino Arana Fundazioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun