Sindikatuetako iturriek azaldu dutenez, Oleagari soldaten izoztearen inguruko txostena entregatzeko eskatu diote aztertu ahal izateko. "Emango digula esan digu. Egiten badu, aurrerapausoa izango da gardentasunaren bidean. Proposamen idatzia ematen badigu, asanbladak benetako aldaketa bat ote den esan ahal izango du", adierazi dute aipatu iturriek.
Atzoko batzarra
Ohar batean, zuzendaritzak langileen batzordearekin egindako bileraren nondik norakoak azaldu zituen atzo. Bilera horretan, Txema Oleagak bere burua aurkeztu zien langileen ordezkariei. "Bilerak goiz osoa hartu digu eta alde biek gatazka konpontzeko borondatea dugula goraipatu dute parte-hartzaileek", azaldu zutenez. Horretarako, "beharrezkoak diren" hartu-eman guztiak burutuko dituztela azaldu zuen Metro Bilbaok. Horrez gain, Oleagak metroko egoera zein den ezagutu nahi izan zuen bere aurreneko bilera horretan. "Metroak bere irudi ona berreskuratu behar du, eta horretarako eztabaida eta sen ona erabili beharko dugu", azpimarratu zuen.
Langileekin biltzen jarraitzeko borondatea agertu du Metro Bilbaoko presidente berriak
Atzo izandako batzarraren ostean, gatazka konpontzeko aldeek erakutsi duten "borondatea" azpimarratu zuen, prentsa ohar bidez, Metro Bilbao garraio enpresako zuzendaritzak. Horretarako, "beharrezkoak diren bilera guztiak" egingo dituela nabarmendu zuen Txema Oleaga presidente berriak. Gogoratu, Loli de Juan Basauriko alkate ohiak hilaren 23an kargua utzi zuela, metroan doan ibiltzeko zeukan txartel bereziaren erabilera okerragatik. Dirudienez, txartel berezi hori beste pertsona batek erabiltzen zuen. Bestalde, Metro Bilbaoko langileen batzordeak "harridura" agertu du atzo hedabideetan argitaratu zen txostena dela eta. Langileen soldata izoztea proposatzen da horretan. Hala ere, Txema Oleaga presidente berriak sindikatuekin biltzeko erakutsi duen borondatea "positiboa" dela azpimarratu dute langileek. Argazkian, Bilboko Udalean PSE-EEren bozeramailea izan da hainbat urtez Oleaga / cc-by-nc-nd agirregabiria.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun