Urte bukaerarekin preso eta iheslarien aldeko mobilizazioak biderkatuko dira Uribe Kosta eta Erandion
Bihar, urteko azken ostiralarekin, euskal preso eta iheslari politikoen aldeko dozenaka mobilizazio izango dira Euskal Herri osoan. Uribe Kosta eta Erandiori dagokienez, besteak beste, Gorlizen, 19:00etan egingo dute elkarretaratzea Itsasbiden (Txoko Etxe tabernaren alboko parkea). Gauza bera egingo dute ordubete beranduago Plentziako Zubiko Pirulin. Sopelan ere 20:00etan izango da kontzentrazioa, Udaletxeko plazan, Egin Dezagun Bidea ekimenaren harira sortu berri duten herri bilguneak deituta. Bestalde, larunbatean, presoen aldeko brindisa egingo dute toki eta ordu berberetan. Bitartean, Urdulizen, BBVaren aurrean batuko dira bihar 20:00etan; eta ordu erdi beranduago, brindisa, mokadua eta triki-poteoa egongo dira herriko tabernan. Algortari dagokionez, tokiko herri bilguneak elkarretaratzera deitu ditu urtean zehar, hilabetez hilabete, azken ostiraleko deialdia egin duten eragileak. 20:00etan batuko dira Telletxen. Bihar iluntzean, Berango, Erandio, Itzubaltzeta / Romo eta Leioan ere izango dira urteko azken ostiraleko deialdiak. Argazkian, azaroko azken ostirala Leioan / © Leioako Herri Bilgunea.
Larunbaterako, berriz, bi hitzordu jarri dituzte: goizez, Txus Martin preso basauritarraren aldeko martxarekin bat egiteko autobusa abiatuko da goizeko 9etan Faduratik. Uribe Kosta mailako garraioa Zaballako espetxera joango da. Bertan, 10:30ean jarri dute hitzordua. Ohiko lekuetan izena eman daiteke. Eta arratsaldean Gabon Zaharreko poteoa 18:30ean Amnistia tabernatik abiatuta. Azkenik, gogoratu, bihar goizean kotxe karabana izango dela eskualdean zehar eta gero 13:00etan triki-poteoa Algortan, Telletxen hasita, Eskumaldeko LABek deituta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun