Estatu mailan gora doa Berangoko Milia. Espainiako Atletismo Federazioak bigarren postuan jarri du, probak orain arte lortutako mailarik onena. Berangoko Udalak babesten duen lasterketaren sustatzailea ezustean harrapatu zuen albisteak. "Ez nuen horrelako posturik espero, diru gehiago daukaten hiriak baitaude. Kontuan hartu behar da iaz bidegabeki bosgarren postura jaitsi ginela, antolakuntzari ez zegokion arazo batengatik; eta 2008 eta 2009an hirugarren izan ginela. Azken hori gainditzea ezinezko ikusten genuen", Josu Hernandezek aitortzen duenez. Berango Atletismo Taldeko arduradunak bazekien "aipatu postua maila handiagoko atletak kontratatuz bakarrik lor zitekeela". "Izan ere, antolakuntza mailan puntuaziorik altuena lortu ohi dugu". Muga hori gainditzea pozgarria da Hernandezentzat. "Bereziki motibatzen nau. Gauzak ondo egiten gabiltzala esan nahi du horrek. Guztia, laguntza ematen duten instituzio eta pertsonei esker, proba Espainiako Federazioak ezartzen dituen arauen arabera egin dadin", azaldu duenez. Data badauka Berangoko hurrengo Miliak. 2012ko irailaren 29an izango dira zilarrezko ezteiak. Argazkian, Berangoko Nazioarteko Miliaren aurreko edizio bat / © Berangoko Albisteak.
Lortutakoa "bultzada izango da miliaren 25 urteak modu berezian ospatzeko eta historia jarraitzen egiteko, iragana eta etorkizuna bereiziz. Ez dut nik esango onenak garela atletak tratatzeko orduan. Hori bai, urtero guk landutako argazkien DVD bat ematen bakarrak gara, baita gure klubeko zein milian parte hartzen duten atletei omenaldia egiteko erabiltzen dugu afaria eskaintzen ere". Hernandezen arabera, horiek dira, "beste hainbat detailerekin batera, Estatu mailako atletarik onenak gurean parte hartzera erakartzen dituztenak".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun