Proposamenak askotarikoak izan daitezke, hala nola, antzezkizun laburrak edo performance txikientzako ekoizpenak, film laburrak egitekoak, erakusketak, enpresa bat sortzeko ideiak, lehiaketak antolatzekoak eta abar. Halaber, hezkuntza eta aisialdirako ekimenak ere aurkez daitezke (ikastaroak, tailerrak), baita sentsibilizazio eta zabaltze proiektuak ere (hitzaldiak eta abar). Diru sariez gain, beste motatako laguntzak jaso daitezke irabazle diren ekimenak martxan jarri ahal izateko, besteak beste, lanbidearen gaineko aholkularitza, orientazioa edo trebakuntza. Interesatuek zer egin nahi duten azaldu beharko dute aldez aurretik prestatutako txantiloian, gidoi modura. Ondoren, arlo ezberdinetako profesionalek euren ideiak azalduko dituzte aurkeztutako proiektuak aberasteko asmoarekin, berriro idatzi eta aurkeztu ahal izateko.
Gazte ekimenak, gaztetxerik gabe
2009az geroztik zazpi izan dira lehiaketari esker aurrera egin duten proiektuak: "Norabide guztiak" dokumentala (2009), Decoración Urbana Audiovisual delakoa (2009), Galería de arte virtual delakoa (2009), Guaitorock(2010), GetxoKlik (2010), Bideosormen tailerra (2011) eta Getxoberpiztu! (2011). Halere, Wanted lehiaketa ez zen 2009an hasi, 2005ean baizik. Orduan, eskoletan software librea irakasteko proiektua nagusitu zen, Gobelab hacklab-eko kideek aurkeztutakoa. Udal arduradunek, baina, baldintza bat jarri zieten saria emateko: erabiliko ziren ordenagailuak Gobelabek egoitza zuen Itzubaltzeta gaztetxean ez jartzea. Gobelabek uko egin zion baldintza horri eta lehiaketa bertan behera gelditu zen, handik eta lau urtetara berriro abiatu arte.
Getxoko Udalak urtarrilaren 16tik otsailaren 3ra arte emango du aukera "Wanted" ideien lehiaketaren laugarren ekitaldirako lanak aurkeztu ahal izateko. Gazteria Zerbitzuaren bitartez antolatzen du sariketa tokiko erakundeak. Sarietan 15.000 euro banatuko dira aurten, iaz bezala, udal iturriek jakinarazi dutenez. Lehiaketara bildu ahal izango dira, ideia edo proiekturen bat izanik, lan-taldea osatzeko beste bi lagun dituzten gazteak; neska-mutilak 18 eta 30 urte artekoak badira. Getxoko bizitza soziala, ekonomia edota kultura aberasten laguntzen dituzten proposamenak aurkeztu beharko dituzte. Deialdiaren oinarriak eta proiektuaren txantiloia herritarren arretarako bulegoetan daude eskuragarri, baita Gazte Bulegoan eta wantedgetxo.blogspot.com webgunean ere. Argazkian, "Getxoberpiztu!" izeneko proiektuaren sustatzaileek irabazi zuten iaz lehiaketa / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun