Abrako itsas hondotik 50 milioi metro kubiko harea erauztea aurreikusten duen Bilboko Portuko Agintaritzaren proiektua ezagutarazi eta kostaldean izan ditzakeen "eragin kaltegarriak" aztertzeko lehenengo asanblada egingo dute hainbat auzo eta kirol elkarte getxoztarrek. Hitzordua ostiralean, hilak 13, jarri dute arratsaldeko 7etan, Algortako Portu Zaharrean, Etxetxun hain zuzen. Bertan, informazioa jasotzeaz gain, "eraso ekologikoa" saihesteko eman beharreko urratsak aztertuko dituzte auzotarrek. Getxoko Bilduk azaldu duenez, "Portuko Agintaritzak berak eskatuta eta Azti-Tecnalia enpresak egindako inpaktu-txostenean jasotzen den moduan, erauzketa honek kalteak eragin ditzake Abrako itsas-faunan, ingurunean eta, bereziki, Ereaga eta Arrigunaga hondartzetan, itsas korronteetan eta olatuen tamainan… Era berean, itsas-hondoan dauden sedimentuek —bereziki metal astunek— uraren kalitatean eragin ditzakete, kutsadura areagotuz". Argazkian, Arrigunaga ingurua.
Azaroko udal osoko bilkuran, Auzokideok plataformako kide batek egitasmoari buruz egindako galderari, "informaziorik ez zutela" erantzun zioten agintari getxoztarrek. Abenduan, berriz, Bilduk gaiaren inguruan aurkeztutako mozioa onartu zuen Udalbatzak. Horren arabera, "hondar erauzketak Getxoko kostaldean —eta bereziki hondartzetan— izan ditzakeen kalteak aztertzeko eta neurriak hartzeko konpromisoa" hartu zuen udal bilkurak, baita herritarrei informatzekoa ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun