Atzo, asteartea, 49 urteko behargin bat zendu zen lan istripuz Pinturas Juno enpresan, ELA sindikatuak jakinarazi duenez. Langilea Cubilsa azpikontratakoa zen, baina Erandioko enpresarentzat lanean zebilen istripua izandako unean. Ezbeharra estalkiko plaka bat konpontzen ari zela gertatu zen, bost metroko altuera batetik behera erori zenean, azaldu dutenez. Hego Euskal Herrian lan istripuz hildako lehenengo behargina da atzokoa. Baina, ELAren hitzetan, "beste istripu batzuetan izaten diren antzeko baldintzak" errepikatzen dira. Oraingoa ere "azpikontratazioaren ondorioa" da, sindikatuaren arabera. "ELAk behin eta berriz salatu du azpikontratazioak prekarietatea eta lan segurtasun falta dakarrela. Oraingo kasuan ere, lanerako segurtasun neurriak ez dira aski izan istripua saihesteko", langile erakundeko iturriek aipatu dutenez. Horregatik, Osalani eta Lan Ikuskaritzari eskatu diete istripuaren nondik norakoak azter ditzatela, erantzukizunak argitzeko. Eguerdian Pinturas Juno-ko langileek elkarretaratzea egin dute enpresaren aurrean, istripua salatu eta hildakoaren familiari babesa adierazteko asmoz. Argazkian, 2009ko apirilean langile baten heriotza salatu zuten Leioan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun