Uribe Kostako Amnistiaren Aldeko Mugimenduak baieztatu duenez, Jon Rosales Algortako preso politikoa gaur aterako da kalera Madrilgo Alcala espetxetik. Hala ere, ez dute ordua zehazterik izan. Arestian aipatu bezala, 2010eko otsailaren 17an Katalunian atxilotu zutenetik, Espainiako kartzeletan preso egon da gazte algortarra. Hasiera batean Soto del Realen espetxeratu zuten, eta gerora, hilebete batera Alcala Mecora eraman zuten. Bertan egon da gaur arte, eta bertatik irtengo da kalera. Rosales irailaren 19tik 22ra epaitu zuten Espainiako Auzitegi Nazionalean, Uribe Kostako beste hamar mutilekin batera, kale borroka taldea osatu eta 2004tik 2007ko uztailera bitarteko hamar ekintza inguru leporatuta. Handik aste batzuetara ezagutzera eman zen epaia, gaztea absolbitu zutela. Kartzelatik irteteko 10.000 euroko fidantza ordaindu behar izan du. Argazkian, Jon Rosales atxilotu zuteneko mobilizazioetako bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun