Bitartean, atzo goizez eta arratsaldez egindako batzarretan, hilaren 19 eta 26ko lanuzteak berretsi zituzten langileek. Halaber, manifestazioa egingo dute aipatu ostegunean, Arriaga plazatik Bilboko foru jauregiraino, goizeko 11etan abiatuta. Bizkaiko Foru Aldundiko Garraio diputatuaren bilera-eskaintza ere onartu dute beharginek. Datorren astean izango da bilera. Asteartean bertan, elkarretaratzea egingo dute Batzar Nagusien aurrean (Hurtado Amezaga kalean), 10:30ean, talde politiko guztiei gutun bana emateko.
Otsaileko mobilizazioak
Astelehenerako, hilak 16, bilerara deitu du enpresa batzordea zuzendaritzak, bi aztergairekin: lan-gatazka eta 39/2010 Legea (soldaten izozketa). Asteazkenean, hilak 18, Metro Bilbaoko presidentearekin du hitzordua enpresa batzordeak. Azkenik, hilaren 23tik 29ra bilera egingo du Administrazio Kontseiluak. "Greba batzordeak, orain arte bezala, bilera horietan norabide batean ala bestean egin litezkeen urratsen arabera jokatu eta erantzungo du", azaldu dutenez. Otsailean mobilizazioak izango diren ala ez, "hurrengo egunetarako dauden hitzorduetan oinarritu da, zer lortzen den edo zer aurreratzen den arabera". Erabakia, beraz, urtarrilaren amaierara arte atzeratu dute.
Gaurko lanuztea bukatuta ordu erdi arteko atzerapenak eragin ditu matxura batek Metro Bilbaon
Metro Bilbaoko zerbitzuak ordu erdira arteko atzerapenak izan ditu Ibaizabalen Eskuinaldetik Bilbora doazen lineatan, enpresa batzordeak deituriko lanuzteak bukatu ondoren metroak martxan jarritako errefortzuko unitateetako batek matxura bat izan ondoren, gaur goizeko 7:46an. Garraio enpresako iturriek Europa Press albiste agentziari jakinarazi diotenez, Basarrate eta Santutxu geltokien artean Arizerako noranzkoan zegoen errefortzuko unitate baten galga sistemaren akats bat izan da matxura. Horren ondorioz, unitatea geldirik izan dute trenbidean zazpi bat minutuz. Matxurari enpresa batzordeak 5:45etik 7:45era bitartean deituriko lanuztea gehitu behar zaio. Langileen arabera, lanuzteok %90eko erantzuna izan dute. Zuzendaritzaren hitzetan, ordea, "ohiko lan egun bateko bidaiarien %87k erabili du garraioa; lanuztearekin 101 langilek (26 trebakutza ikastaroetakoak) bat egin dutela". Halaber, matxura horrekin batera, beste bi jazoera izan dira gaur goizean zehar, baina Metro Bilbaoren arabera, "ez dute eragin askorik izan maiztasunetan". Argazkian, langileen mobilizazioetako bat / © LAB Metro Bilbao.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun