Azaroko udal osoko bilkuran, Abrako itsas hondotik 50 milioi metro kubiko harea erauzteak eta itsas-bidai ontzien kaia handiagotzeak "bata bestearekin zerikusirik ez" zutela adierazi zuen Imanol Landa alkateak, Auzokideok plataformako kide batek egitasmoari buruz egindako galderari erantzunez. Abenduan, berriz, "erauzketaren zati txiki bat kaia handitzearekin lotura" bazeukala aipatu zuen Arregik, Auzotarrok elkarteko kideek azaldu dutenez. "Bere kezka" ere agertu omen zuten Hirigintza zinegotziak eta Imanol Landa alkateak berak.
Zabalgune berria eta lurrazpiko aparkalekua
Joseba Arregi Hirigintzak zinegotziak baieztatu duenez, Getxoko Udala eta Bilboko Portuko Agintaritza elkarlanean ari dira itsas-bidai ontzien moilaren gaineko proposamenean, “horren beharrak esparruaren diseinu on bat egiteko gure nahiak bat egin dezaten”. Ildo horretan, tokiko agintariak aurreratu du moilako zabalgune berria proiektatzen ari direla, bertan berdegune handi bat eta lurrazpiko aparkalekua izateko; “udalerriari zein itsasontziei zerbitzua eskaintzeko, Arriluzeko moilaren egungo estetika errespetatuz”. Arregik aipatu du "Getxo itsas-bidai ontzien Euskadiko sarbide" bihurtu dela. “Hartara, errealitate hori itsas-bidai ontzien moila berrian behin betiko sendotzearen aldekoak gara, eta horregatik, bidaiariek Getxon gastatzen jarrai dezaten ahalegintzeaz gainera, azpiegitura berri hori aprobetxatu nahi dugu ere udalerriarentzat izango diren zerbitzu berriei bide emateko”, amaitu du.
Itsas-bidai ontzien moila handitzeko eskuz esku lanean ari dira Getxoko Udala eta Portuko Agintaritza
Getxoko Udala Bilboko Portuko Agintaritzarekin elkarlanean ari da Arriluzeko itsas-bidai ontzien moila berriaren gaineko azken proposamena finkatzeko, prentsa ohar bidez Joseba Arregi Hirigintza zinegotziak jakinarazi duenez. Tokiko agintariak Getxoko PPk esandakoa baloratu du. Alderdi horrek gaur bertan prentsa aurrean agertu dio bere babesa kai berriaren proiektuari, "lehenago azpiegitura horren aurka agertu bada ere", Arregiren arabera. "Zehazki, 2004an, PP espresuki azaldu zen azpiegitura hura prestatzearen aurka, Getxorentzat onurak baino kalteak ekarriko zituela argudiatuz. Ziur gaude PPrekin eta itsas-bidai ontzien moilarekin gertatu den hau udalerrian aurrera eramaten ari garen beste proiektu handi batzuekin ere gertatuko dela”, gaineratu du zinegotziak. Bilboko Portuko Agintaritzak proiektatutako hondar erauzketari buruz, aldiz, ez dute ezer aipatu gaur batzuek zein besteek. Azken gai horren gainean, asanblada egingo dute bihar hainbat auzo eta kirol elkarte getxoztarrek. Hitzordua arratsaldeko 7etan jarri dute, Algortako Portu Zaharrean, Etxetxun hain zuzen. Argazkian, 2008ko urriaren bukaeran bisitatu zuen Algortako kaia, Queen Elisabeth 2 itsasontziak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun