Bestalde, igandean antzerki familiarraren txanda izango da: Marie de Jongh-ek "Alabatxo" lana estreinatuko du Kultur Leioan, 18.00etan. Sarrera 5 eurotan izango da. Laida, lau hilabeteko haurduna, eta Martin haren bikotekidea, egunero daude irudikatzen nolakoa izango den euren bizimodua haurra jaiotzen denean, eta etxea erabat aldatu dute jaioko den alabarentzako gauzekin. Emakumearen aita, Tomas zaharra, eurekin bizi da; umore txarreko gizona, kexatia, jeloskorra, erretxina, batzuetan umea, gehienetan bihurria, jasangaitza eta bien etorkizunerako traba. Halako batean, ordea, dena aldatuko da: Laidak haurra galduko du.
Orduan, Tomasek, daukan onena aterako du bere baitatik, bikote gaztearen bizitza berriz osatzeko. Eta zoriona berriz itzuliko da etxera. Familiako hiru senideak, elkar hartuta eta harmonia ederrean, beste haur baten jaiotza prestatzen hasiko dira.
Asteburu honetan antzerkia izango da nagusi Kultur Leioan, bertan bi lan ikusteko aukera izango baita: gaur bertan, publiko nagusiari zuzendutako bat; eta igandean, familiarekin ikustekoa. Gaurko antzerki lana Kulunka Teatrok eskainiko du, 20:30ean, sarrera 12 eurotan dela. "André y Dorine" izeneko obran adineko bikote bitxi baten istorioa kontatzen da. Beste asko bezala, errutinak eragindako zabarkerian eroria. Behinola elkarrenganako grina pizten zuena, axolagabekeria bihurtu da orain, eta areago, liskarbide ere bai. Baina gertaera bat dator monotonia hori haustera: gaixotasuna, alzheimerra, gure antagonista handi hori, gure oroipenak, memoria eta identitatea irensten dituena. Horrela hasiko da berriz ere André eta Dorineren arteko harremana: oroimenean zehar egindako bidaia; nor izan diren gogoratzea, nor diren ez ahazteko. Umorez eta emozioz beteriko ikuskizuna da, non Familie Flöz-en tankerako maskarek poesia bisuala ezartzen duten. Argazkian, Kulunka Teatroren "André y Dorine" antzelana / © Leioako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun