Euskal Herrian Euskarazen oharra
Mezu honen bidez, Euskal Herrian Euskaraz (EHE) herri mugimenduko eragiletik hurrengo oharra helarazi nahi dizuegu:
"Egun ilun eta triste bezala gordeko dugu gaurkoa Euskal Herri euskaldunaren bidea jorratzen ari garenok. Izan ere, Jose Luis Alvarez Enparantza Txillardegi, Euskal Herrian Euskarazeko sortzaileetako bat, zendu da. Euskal kulturari, euskalgintzari eta herri mugimenduari oro har egindako ekarpenak gizon handi egin zuen gure Txillardegi. Urte bete ere ez da pasa iazko otsailean EHEk Euskal Herriari emandako guzia eskertzeko merezitako omenaldia egin ziotenik, eta joan egin zaigu jada. Joan egin zaigu, baina ez gaitu utzi; orain arte bezala, euskaltzaleon erreferente nagusien artean mantenduko baita etorkizunean ere. Irakasgai garrantzitsu asko utzi dizkigu Txillardegik. Orain besteoi dagokigu berak marrazten lagundutako bidean urratsak ematen jarraitzea.
EHEtik gure samina agertu eta dolumina adierazi nahi diegu bere sendiari eta lagunei, besarkadarik sentituena helaraztearekin batera. Agur eta ohore, Txillardegi!"
EITBk egindako bideoa (© Eitb.com)
Pasa den otsaileko ekitaldeaz egindako bideoa (© Hamaikabilbo.tv)
Jose Luis Alvarez Enparantza "Txillardegi" euskaltzale, hizkuntzalari, idazle eta politikari donostiarra eguerdian zendu da, bere etxean. Alvarez Euskal Herriko hizkuntza, politika eta kultur mailan eragile garrantzitsuenetakoa izan da azken mende erdian. Besteak beste, ETA, ESB, Altsasuko mahaia, Herri Batasuna, Euskal Herrian Euskaraz eta Aralar erakundeen sortzaileetako bat izan zen. Hizkuntzari dagokionez, Federico Krutwig, Koldo Mitxelena eta beste batzuekin batera euskara batuaren bultzatzaile nagusietakoa izan zen. Halere, Euskaltzaindiko kidea izateko betoa ezarri zioten. Soziolinguistikan, kalkulu matematikoaren asmatzailea izan zen. Literaturan, "Leturiaren egunkari ezkutua" bere eleberria euskal nobelagintza modernoaren abiapuntutzat jotzen da. Berria.info-k jakinarazi duenez, hil kapera Donostiako Errekalde auzoko beilategian jarri dute bihar 15:15ak arte. Errausketa familia giroan egingo dute bihar 15:30ean. Argazkian, "Txillardegi" iazko otsailaren 12an, Donostian, EHEk egin zion omenaldian / cc-by-sa Zuzeu.com.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun