Ertzaintzak Itzubaltzeta / Romoko Pinueta auzoko tabernari bat atxilotu zuen atzo droga trafikoa leporatuta. Vasco Press albiste-agentziak Herrizaingo Sailaren iturriak aipatuta zabaldu duenez, atxilotua gizonezkoa da, 44 urte ditu eta Leioa udalerriko Xaho plaza kaleko Donosti tabernan egiten zuen lan. Atzo arratsaldean hainbat ertzainek eta txakurrek atzeman zuen ustezko trafikatzailea tabernan. Operazioan, 120 gramo kokaina, haxix eta marihuana eta 2.500 euro bahitu zituzten. Tabernariari droga banatzea eta bezeroei aretoan drogak kontsumitzea uztea egotzi dizkiote. Dena den, operatiboa pasa den abenduan abiatu zuten ertzainek. Izan ere, taberna horretan trafikatzen zuteneko susmoa zutela lokala zelatatzeari ekin zioten poliziek. Bezero batzuek oso egonaldi txikiak egiten zituztela ohartuta, atzo aretoan sartu eta miaketa burutu zuten. Bertsio ofizialaren arabera, sarrera gunean kokaina poltsatxo batzuk topatu zituzten lurrean eta barran, "seguru aski bezeroek botata, agenteak ezustean heltzean".
Aretoko gela batean, sarbidea mugatua duena, Txakur Unitateko txakur batek kokainako 100 bat gramo zituen poltsa topatu ei zuen. Era berean, sukaldean kokaina, haxix eta marihuana dosiak, 2.500 euro, prezisio balantza bat eta drogak mozteko sustantziak ere aurkitu omen zituzten. Horren ondorioz, tabernako langilea atxilo hartu zuten eta datozen orduetan epailearengana eramango dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun