Ostiral honetatik otsailaren 24ra bitartean zabalik egongo da "Zubiak" aniztasunaren aldeko eta arrazakeriaren kontrako film laburren lehiaketarako lanak aurkezteko epea. Getxoko Udalak antolatuta, aipatu baloreak dituen gizartearen aldeko urrats gehiago ematea da ekimenaren helburua. Sariketarako oinarriak www.getxo.net/zubiak web gunean daude ikusgai. Fikziozko film laburrek eta dokumentalek parte hartu ahal izango dute lehiaketan. Gaiak immigrazioari eta kultur, erlijio edo gizarteko aniztasunari lotutakoak izan beharko dira, eta kultura arteko proposamenak eduki beharko dituzte kontuan, salatze ikuspegiak ahaztu gabe. Lanak 2008ko urtarrilaren 1aren ondoren ekoiztutakoak izan behar dira eta gehienezko iraupena 20 minutukoa. Euskaraz edo espainolez eginda ez dauden produkzioek amaierako elkarrizketen zerrenda aurkeztu beharko dute, frantsesera edo ingelesera egindako itzulpenarekin batera, ondoren jaialdiak, proiektatzeko ordurako, euskarazko eta espainolezko azpitituluak egin ditzan, udal iturriek zehaztu dutenez. Argazkian, arrazakeriaren kontrako ekintza Algortan / © Getxoko Udala.
Epaimahaia, besteak beste, honako hauek osatuko dute: Zuria Arzua, SOS Arrazakeriako kidea; Borja Crespo, zinema zuzendaria eta komiki sortzaile getxotarra; Manu Gomez, Zineklubeko ordezkaria; eta Rosabel Argote, Kaliforniako Unibertsitateko literatura eta zinema espainiarreko doktorea eta CEAR Euskadi elkarteko teknikariak. Epaimahaiak hautatutako film laburrak martxoan zehar ikusi ahal izango dira, hil horretan ospatuko den Arrazakeriari amaiera emateko Nazioarteko Egunaren ospakizuna dela eta. Hiru sari banatuko dira, 400, 300 eta 200 eurokoak eta aipamen berezia edukiko du publikoak aukeratzen duen lanik hoberenak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun