Espainiako Barne Ministerioak Etxeberriari lehergailuak egiteko hainbat material atzeman ziotela zabaldu du. Gainera, kristal-erretxina, epoxya eta zirkoflexa hori "duela gutxi" eskuratutakoa dela gaineratu dute. Halere, Etxeberriari atzeman dioten materiala, kristal erretxina, oso ohikoa da, edonon eros daiteke eta erabilera asko dauka. ETAk, besteak beste, agiriak faltsutzeko erabiltzen du, Berria.info-k argitu duenez.
Iñigo Sancho Marco eta Ruben Rivero Campo atxilotuei, bestalde, 15 identifizkazio agiri, Guardia Zibilaren lau nortasun txartel, Portugalgo beste dokumentu bat, hainbat matrikula faltsu eta dirua atzeman zieten. Rivero Balmasedakoa da, Sancho Bilboko Errekalde auzokoa eta Etxeberria donostiarra.
Joan den larunbatean, Parisetik 150 bat kilometrotara dagoen Joigny herriko tren geltokian atxilotu zituzten Jon Etxeberria Oiarbide, Iñigo Sancho Marco eta Ruben Rivero ETAko ustezko hiru kideak Auxerretik Parisera eraman dituzte, Laurence Le Vert epailearen aurrean agertzeko. "Terrorismoaren aurkako borrokako" iturriak aipatuta EITBk zabaldu duenez, Etxeberriari Jean-Serge Nerin polizia frantziarraren hilketarekin zerikusia izatea leporatzen diote. Guardia Zibilak eta Frantziako informazio zerbitzuek batera lan egin zuten ETAko ustezko kidea atxilotzeko. Polizia bere zain zegoen tren geltokian, eta, trenetik jaistean beste bi gizonezkorekin biltzean, hirurak atxilotu zituzten. Argazkian, artxiboko irudi bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun