Pinosoloko auzian EAJ eta Ezker Batuaren arteko koalizioak izan duen jokabidea "kaltegarritzat" jo du Leioako Bilduk. "Baliteke herri honek esleipendunari milioi askoko kalte‐ordaina ordaindu behar izatea, eta horrek leioztarren poltsikoak itotzea", salatu du Bilduk. Egitasmoaren esleipenean izandako arau-hauste susmoei dagokienez, ikerketa batzordea eskatu du koalizioak. Gogoratu behar da proiektua bigarrenez esleitzea erabaki zutela, lehenengo erabakian forma akatsak egon zirelakoan. Horrek lehiaketan parte hartu zuten hainbat enpresen auzi-errekurtsoa ekarri du, baita Lehiaren Defentsarako Euskal Zerbitzuak esleipendunari irekitako espedientea ere.
Torresoloko igerilekuak
Leioako kirol azpiegiturekin jarraituz, Torresoloko igerilekuen kudeaketa eredua "diru‐eralketa hutsa" dela adierazi du Bilduk. Zerbitzu publiko horren kudeaketaz arduratzen den Guedan enpresa pribatuak %12ko irabaziak lortzen ditu, kudeaketa horren emaitza ekonomikoa edozein dela ere. Torresolo bera defizitarioa izanda, Udalak %12a ordaintzen dio Guedani. Berriro ere diru hori leioztarron poltsikotik aterata", salatu dutenez.
Txosten juridiko-ekonomikoak erabakiko du Pinosoloko kiroldegiaren etorkizuna
Txosten juridiko-ekonomikoa eginez erabakiko dute Pinosoloko kiroldegia egiteko indarrean dagoen kontratua bertan behera utzi edo proiektu berri bat egiteko luzamendua emango duten. Horixe bera erabaki zuen Leioa Kirolak udal erakundearen administrazio kontseiluak asteartean egindako bilkuran, Bilduk mahai gainean jarritako proposamenari jarraiki. Izan ere, aipatu kontratua ezeztatzearen ondorioak zer nolakoak izan daitezkeen jakin nahi dute alderdi politiko leioztarrek. Bitartean, Pinosoloko proiektuaren inguruko "erabakirik ez da hartuko", koalizio independentista eta soberanistak azaldu duenez. Hala ere, egitasmoari "ezetz borobila" agertu dio jada Bilduk: "Leioak ez du behar holako egitura erraldoirik, ezta hau bezalako 60 milioi euroko egitasmorik ere. Leioaztarron dirua xahutzeaz gain, herria hipotekatzen du", salatu dutenez. Ildo horretan, "prozesu parte-hartzaile baten beharra" ikusten dute, "herri honek dituen beharrei erantzungo dien kirol ekipamendua egiteko". Argazkian, Torresoloko igerilekuak / © Leioako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun