Uribe Kosta eta Erandioko Justuri irrati egitasmoa era askean zabalduko ditu bere eduki guztiak. Irrati euskalduneko talde bultzatzaileak jakinarazi duenez, komunikabideak sortuko dituen saioak, audio korteak, albisteak eta bestelako edukiak ez dira copyright-ez "giltzapetuta" egongo. Horren ordez, creative commons lizentziaren pean jarriko dituzte eskura Interneten, nahi duenak doan eta nahieran erabili, jaitsi eta berrerabiltzeko. Horretarako, atribuzioa deritzoten lizentzia (cc-by) aukeratu dute, iturria aipatzea besterik ez duena eskatzen. Neurria aho batez hartu zuten atzo, ostegunean, egindako batzarrean "euskarak jada nahiko muga eta oztopo dituelako. Alde batetik, gure asmoa euskaldunei euskarazko baliabideak topatu eta erabili ahal izateko lana erraztea da eta beste aldetik kultura aske izan behar delakoan gaude", adierazi dute.
Justuri irratia Uribe Kosta eta Erandioko euskalgintza jartzen ari da martxan, eskualdean kalitatezko irrati zerbitzu publiko eta komunitarioa emateko asmoz. Xede horrekin Eusko Jaurlaritzak laster zabalduko duen FMko irrati lizentzien deialdira aurkeztuko da Justuri. Egun, hamaika elkartek osatzen dute talde eragilea, tartean "UK" aldizkaria, AEK, Algortako Bertsolari Eskola eta Erandio, Getxo, Leioa eta Sopelako euskara taldeek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun