Kirol nazionalaren aurtengo lehia azaroaren 29an aurkeztu zuten Nafarroako Arbizu herriko udaletxean. Bertan jakinarazi zutenez, 2012ko erronka iaz izandako 2.200 bikoteak gainditzea da. Guztira, 40.000 euro baino gehiago banatuko dituzte sarietan.
Gaur zortzi, hilak 28, Uribe Kostara ailegatuko da Euskal Herriko Mus Txapelketaren laugarren edizioa. Eskualdeko hordagozaleen datorren larunbateko hitzordu hori, baina, bikoitza izango da. Alde batetik, Getxo udalerriko kanporaketa Itzubaltzeta / Romoko Branka herriko tabernan jokatuko dute, arratsaldeko 4:30ean. Beste aldetik, ordu berean, Leioako kanporaketa izango dute Plaza Gorriko Ganeko ostatuan. Bietan bikote bakoitzak 20 euro jarri beharko ditu larunbatean bertan. Oraingoz, antolatzaileek ez dute zabaldu eskualdeko beste herrietan txapelketa jokatuko den. Dena dela, Uribe Kostatik sailkatuko diren bikoteek Bizkaiko kanporaketa jokatu beharko lukete otsailaren 24 eta 26 bitartean eta fase hori gaindituz gero martxoaren 17an Euskal Herriko finala lukete Arbizun. Argazkian, seguru asko, tabako paketerik mahai gainean ikusteko aukerarik ez da egongo aurten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun