Aurretik, Amnistia tabernan sartu ziren kaleko arropaz jantzitako ertzain kaputxatuak, atean beste polizia kaputxatu gelditu zirela armekin, inor bertara sartzea galarazten. "Taberna barruan Aitor Elortzaren omenaldia galerazita zegoela komunikazioa eman diete tabernan zirenei. Tabernariek esan diete tabernak ez zuela loturarik ekitaldi horrekin, paperean ere ez zen taberna aipatzen eta ez dute komunikazioa hartu nahi izan. Horrez gainera, tabernan lanean zirenak identifikatu dituzte -bestela atxilotuak eramango zituztela mehatxatu diete- eta presoen argazkiak ziren ikustera joan direla esan dute", azaldu du errepresioaren kontrako erakundeak.
Tirabira
Bestalde, hainbat tirabira gertatu ziren eta horien artean polizia batek furgonetaren barrutik txistua bota zion pertsona bati aurpegian. "Beste batek adineko emakume bati 'Vete a casa, vieja' esan zion, eta Ertzaintzaren buruak, guztia entzun zuenez, 'Contrólese, agente' esanda errieta itxura besterik ez zuen egin", AAMk salatu duenez.
Dozenaka ertzain bidali zituen ostiralean Algortara Eusko Jaurlaritzaren Herrizaingo Sailak, Aitor Elortza Unanue iheslari politikoa zenari duela sei urtetik egiten zitzaion omenaldia galarazi eta Amnistia tabernatik herriko presoen argazkiak bahitzeko (bertan ez zegoen irudirik). Arratsaldetik ibili ziren gora eta behera, gutxienez, zazpi furgoneta (Brigada Higikorrekoak tartean), kamuflatutako beste bat eta hainbat patruila auto. Baina ez ziren bakarrik horretara mugatu: Telletxe plazan ostiral guztietan egiten den presoen aldeko elkarretaratzea ere galarazi egin zuten, Elortzaren aldeko omenaldia debekatuta zegoelako aitzakiarekin. "Kontzentrazio horrek baimena zeukala onartu zuten, eta debekua justifikatzeko esan zuten baimena eskatu zuen pertsonari telefonoz deitu ziotela, baina ez zuela telefonoa hartu. Pertsona horren telefonoak, ordea, ez zuen Ertzaintzaren deirik erregistratu", azaldu du Uribe Kostako Amnistiaren Aldeko Mugimenduak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun