Enpresaburuek eta Ertzaintzak ukatu egin dute ETA merkatariak mehatxatzen ari denik
Confebask, SEA eta Cebek enpresarien elkarteek eta Ertzaintzak ukatu egin dute ETAk azken hilabeteotan merkatari txikiei "estortsio egin" dienik, Jorge Fernandez Diaz Espainiako Barne ministroari erantzunez. "ETAren estortsioa" hizpide duen "La Gaceta"-ren artikulu baten inguruan galdetuta, Diazek atzo esan zuen albistea hedabideetan azaldu bada, "merkatari eta norbanakoek esperientzia hori pairatu eta salatu egin dutelako" izan dela. "Horrek erakusten du lanean jarraitu beharra dagoela", gehitu zuen Barne ministroak: "ETAk egitura urriagoa duen arren, aparatu logistikoa mantendu nahi du". Aldiz, "El País" egunkariak dioenez, Ertzaintzaren eta Eusko Jaurlaritzaren iturriek azaldu dute Diazek eta La Gacetak estortsio gisa definitu dutena borondatezko ekarpen bat dela, ETAko presoen senideei kartzeletarako joan-etorriak ordaintzen laguntzeko.
"Ezker abertzaleak bere inguruko tabernetan daukan eta presoen senideen elkarretaratzeetara eramaten duen itsulapikoa da", dio El Paíseko albisteak. Edozein modutan, iturriok diotenez, "kasu bakanduak dira". Ezker abertzaleak "intoxikaziotzat jo ditu Barne ministroaren adierazpenak, eta "inmobilismoa justifikatzeko" ETAren mamua elikatu nahi izana leporatu diote ohar bidez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun