Agerraldian irakurritako testua
Martxoak 10, larunbata, Konpromiso Eguna Leioan.
Euskal Herritik Bilbora, Bilbotik Leioara eta Leioatik espetxeetako sarrailatara, bidea egiten ari gara. Bidea pausutxuz-pausutxu, bakoitza bere erritmoan, baina norabide berean; alegia, Euskal Presoen eskubideak errespetarazteko bidean.
Bilboko bultzada kolosala aprobetxatuz, erritmoak bateratu eta Leioan geure ahotsa entzunarazteko hitzordua daukagu martxoaren 10ean: Elkartasun Eguna edo, hobe esanda, Konpromiso Eguna. Izan ere, bertan, herritarrok eta eragile sozial-politiko eta kulturalok euskal presoen eskubideen alde geure pausutxuak emateko aukera izango dugu.
Espazioa eta eguna soilik dago zehatuta; hortik aurrera, herritar eta eragile bakoitzaren esku dago programa, bai Elkartasun Egunekoa, bai egunaren aurretikoa.
Oraingoz, pausutxu hauek ematen hasi gara:
• Basaki musika taldea ekimenaren kanta egiten ari da, herriko beste musikari batzuen laguntzarekin. Laster, herriko txoko guztietan entzungai egongo da.
• Herriko koadrila batzuek gaueko futbol txapelketa arina antolatuko dute martxoaren 9rako; oraingoz, lau talde osatu dituzte.
• Herriko sortzaile eta artisauek azoka antolatzen ari dira; dagoeneko, zortzi postu lotu dituzte, eta asmoa da 15 baino gehiago ipintzea.
• Truko, Kuko eta Borenwaider pailazoek obra berria estreinatuko dute. Gainera, haur gunea eta jolasak ere egongo dira, Gaztetxearen eta beste lagun batzuen eskutik.
• Kirolari talde bat herri lasterketa antolatzea pentsatzen ari da.
• Peruri eta Erandioko Goiherriko auzokide batzuek herri-kirolekin zer ikusia daukan ideia bat lantzen ari dira.
• Sukaldari eta Ehiza taldeko kide batzuk 200 pertsonentzako bazkaria antolatzeaz arduratu dira.
Mus txapelketa martxan dago.
• Gaueko kontzertuak eta parranda lotzen hasiak gara.
• Eta, zelan ez! Pagoa Zulueta eta Erika Bilbao herriko presoek ere, beren lekua izango dute.
Hemendik aurrera, egitaraua lotzen jarraitzeaz gain, ahalik eta jende gehienarengana joango gara ekimenaren berri ematera eta pausutxuak eskatzera. Gure nahia da Leioan azken urteetan egon den dinamikarik handienetarikoa gauzatzea.
Leioan ere, kolosala izango da!
Gurekin harremanetan ipintzeko:
http://www.pausotxubet.tk/index.php
Facebook: Pausutxubet
Geuk be, pausutxu bet aurrera, euskal presoen eskubideen alde.
Agerraldia iruditan
Pasa den urtarrilaren 7an Bilbon burututako presoen aldeko ekimen "kolosalaren" itzalpean, "euskal preso politikoen eskubideak agenda politiko, sozial eta kulturalaren erdigunean" jartzeko erronka hartu zuen Leioako auzokide talde batek. Pasa den larunbatean, abian jarritako "Pausutxu bet aurrera" dinamikak bere lehen urratsa jarri zion martxoaren 10ean zein bezperan ospatuko duten Elkartasun Egunari. Egitarauaren zirriborroa aurkezteko ehun bat leioaztarrek hartu zuen parte agerraldian. Bertan, Basaki musika taldeko kideak, Bilduren zinegotziak, gaztetxeko kideak, euskara elkarteko bazkideak, ikastolako partaideak, dantzariak, kirolariak, sindikalistak, jubilatuak eta abar luze bat izan ziren. Gauzak horrela, jada hainbat urrats txiki eman dituztela azaldu zuten. Besteak beste, Elkartasun Eguneko abestia Basaki taldea prestatzen dabil.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun