"Auzolanean eta denbora librean egindako proiektu herrikoi gisa" definitzen du dokumentala Castrok. Horrekin batera, istorio propioak kontatzearen garrantzia azpimarratzen du: "Gure istorioak kontatzen ez baditugu, ahanzturan gal daitezke, edo bestela besteek konta ditzakete gure ahotik". "Herrialde berdea" izenburuak baditu aurrekariak. 70eko hamarkadan izen bera zuen ipuin bat argitaratu zuten, Iharrak berak idatzitakoa. Hori oinarri hartuta, animaziozko film labur bat egin zuten, baita izen bereko abesti bat ere.
"Herrialde berdea" dokumentalaren aurrerakina
Ostiral honetan, urtarrilak 27, 21:00etan, "Herrialde berdea" dokumentalaren aurkezpena egingo dute Plaza Beltza herri kultur-gunean, Larrabasterrako Akilino Arriola kaleko 59. zenbakian. Proiekzioa bukatutakoan egileekin hitz egiteko aukera izango da, antolatzaileek adierazi dutenez. Dozena bat laguni egindako elkarrizketak biltzen ditu lanak. Horien bidez, Jon Andoni Aranguren "Iharra" eta Jabier Goitia "Kabi" zirenen bizipenak ezagutzera eman nahi dituzte, baita biek bizi zuten garaiko egoera azaldu ere. Iharra tiroz hil zuen Guardia Zibilak, 1972an; Kabi, berriz, lehergailu batek eztanda eginda hil zen, 1991n. ETAko militanteak ziren biak, bi belaunalditakoak, eta "Herrialde berdea" lanak haien ibilbideak batu ditu, istorio bakar bat osatuz. Bi pertsonaien arteko lotura Nagore Mujika da, Iharraren lehengusina eta Kabiren neskalaguna. Hibai Castroren gidoi eta zuzendaritzapean, Gorka Calzadak, Iker Aroztegik eta Nagore Mujikak lan egin dute. Argazkian, hainbat lagun Plaza Beltzan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun