Beste alde batetik, eta zerbitzu teknikoen hitzetan, proiektuaren eta inpaktu-txostenaren erakusketa publikoaren eta helegiteak aurkezteko epea amaitu baino astebete lehenago izan omen zuen horren berri Getxoko Udalak. "Hala ere, auzotarrek azaroko udal batzarrean galdetu zutenean inolako informaziorik ez zutela erantzun zuten, ordura arte helegiteak egiteko denbora-tartea amaituta zen arren. Horren ondoren, udal gobernuak behin baino gehiagotan ukatu du informaziorik zuenik, eta jakin izan zuenean dagoeneko helegiteak egiteko epea itxita zegoela adierazi zuten, hala ere 'ekarpenak egiteko prest' ageri ziren, auzotarren eta Bilduren eskaeren aurrean", kritikatu du koalizio ezkertiarrak. Besteak beste, hondartzen inguruan txosten zehatzagoa, dragaren ondorengo jarraipen sakonagoa (bi urtetan behin, urtero lehen urteetan) eta informazio-bideak zabalik izatea izango dira Portuko agintariei luzatuko zaizkien eskaerak.
Helegiteak
Muskizko Udalak, Ekologistak Martxan taldeak eta Muskizko zein Getxoko auzotarrek helegiteak aurkeztu dituzte proiektuaren eta inpaktu-txostenaren inguruan, Bilduk jakinarazi duenez; baina oraindik ez dute erantzunik jaso. "Esan bezala, Getxoko Udalak, berriz, ez du ekintzarik egin eta, nahiz eta —txostenean jasotzen den moduan— honako draga honetan inpaktu handiena Abra barruko kostaldean pairatuko den, eta bereziki Ereaga eta Arrigunaga hondartzetan", salatu dute ezkertiarrek. Era berean, hondoan dauden sedimentuak mugitzean suerta daitekeen kutsadura ere ez da ondo neurtu. Muskizko Udalak eskatuta Alex Cearreta geologo eta EHUko irakasleak egindako txostenean jasotzen den legez, "oso zundaketa gutxi eta arinak" egin dira, aditu horren ustez. Izan ere, Luzuero gaina hondakin-isurketa askoren gunea izan da historikoki.
Abrako hondar-erausketak izango dituen ondorioak gutxiestea egotzi dio Bilduk Getxoko Udalari
Abran, Luzuero gaina parean, Bilboko Portuko Agintaritzak egin nahi duen hondar-erauzketari buruzko inpaktu-txostena ontzat eman du Getxoko Udal Gobernuak, Bilduk zabaldu duenez. Koalizio ezkertiarrak azaldutakoaren arabera, "Hirigintza, Lurralde Antolaketa eta Ingurumenari buruzko Batzordean, Bilduk aurkeztutako galdera bati erantzunez, Azti-Tecnaliak Portu Agintaritzarentzat egindako txostena ontzat ematen zutela adierazi zuten udal zerbitzu teknikoek". Jarraitu dutenez, horren irakurketa egin eta gero, hala ere, bertan agertzen diren kalteak “neurrizkoak” direla ondorioztatu zuten udal langileek. Ondokoa esan omen zuten: “beharbada orain udaberrian egiten dugun harearen mugimendua (pilatzen den tokietatik galtzen den tokietara) pixkat handiagoa izango da dragaren ondorioz”. Horretaz gainera, harearen erauzketak olatuen indarrean eta altueran izango duen eragina ere minimizatu ei zuten teknikariek. "Hori dela eta, Udal Gobernutik ez dute erauzketak Getxoko ingurunean, hondartzetan, eta ekonomi jardueretan (arrantzan eta turismoan bereziki) izango dituen eraginen ikerketa independenterik eskatuko, nahiz eta abenduko osoko bilkuran onartutako mozioan hala jasotzen den", salatu du Bilduk. Abran, 50 milioi metro kubiko harea kendu nahi dute itsas hondotik, inoiz espainiar Estatuan aurreikusi den erauzketa edo dragarik handiena izango zen horretan. Argazkian, larunbatean elkarretaratzea izango da 13:30ean Algortako Portu Zaharrean, Abra Bizirik Getxoko plataformak deituta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun