ELA sindikatuak deituta, Leioako 35 udal langile inguruk egin zuten elkarretaratzea joan den ostiralean, udaletxean bertan, lan-eskubideen murrizketak salatu eta hitzarmena eskatzeko. Adierazi zutenez, "urtebete baino gehiago" daramate hitzarmenik gabe. "Sinatu genuen azkena (Udalhitz 2008-2010) Udalak hautsi zuen bere kabuz 2010eko erdialdera, Zapateroren dekretuaren murrizketak zirela eta", gaineratu zuten. Beharginen hitzetan, Udal horretako gehiengo sindikalak, ELAk eta LABek, "bi bider" aurkeztu dute negoziazio-plataforma. Baina, "luzaroan erantzunik eman gabe, Udalak Eudelen baitan negoziatzen denari atxikituko zaiola" esan diela salatu zuten. ELAko ordezkariek gogoratu zutenez, "Eudelek ez du bilerarik egin 2010eko otsailetik". Eta egingo duenean, "beldur" agertu ziren udal langile leioztarrak, "ez ote duen gomendatutako soldata-izozketa eta beste ustekaberen bat (ordainsariak murriztu, soldatak jaitsi edo beste zerbait, seguru asko txarragoa)"; beraien ustez, "albisteak okerretik okerragora baitoaz". Eudelen zein Udalaren aurrean, beraien hitzarmena negoziatzeko duten "eskubidea" aldarrikatu dute. Udal langileek diotenez, "gure egoera gero eta txarragoa bada, denok aterako gara kaltetan. Gu eta zuok (herritarrok)". Argazkian, langileak Leioako udaletxeko frontoian.
Eskaera nagusien artean, orain arte "ostutakoa" eta soldatak eguneratzea nahi dute Leioako udal langileek: "2010eko ekitaldia ixtean KPI 2,4koa izan da. Azken urte eta erdian esan dezakegu %10 eta %13 bitartean galdu dugula eroste ahalmena. Beste udal batzuetan ez diete aplikatu soldata murrizketa, edo gero itzuli diete: Legezko baliabideak badaude... baldin eta horretarako borondaterik badago", azaldu zuten ELAkoek. Bestalde, gaixotasun bajetan soldata murriztearen, lanaldia luzatzearen eta Madrilen edo Gasteizen onetsitako gainontzeko murrizketen kontra agertu ziren. Horretaz gain, gaixotasun bajetan ordezkapenak egitea, zerbitzu publikoak sendotzea, bitarteko langileen tasa mugatzea eta euskalduntzea zein berdintasuna bultzatzeko neurriak negoziatzea eskatu zituzten, ostiraleko mobilizazioan. "Udalak ez du negoziatu nahi, eta guk aurre egin behar diogu Udalari. Gure lan baldintzak bermatu behar ditugu hitzarmen berri batez. Orain arte ikusitakoa etorkizun ilunago baten hasiera izan liteke. Herri-administrazioko langileak zigortzeko neurri-segida hori eteteko, zuek guztiak behar zaituztegu", amaitu zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun