Joxi Basterretxea "Azken tranbiaren itzala"-z mintzatuko da iluntzean Algortan
Joxi Basterretxea Polo idazle eta unibertsitateko irakasleak "Azken tranbiaren itzala" bere eleberriaren nondik-norakoak azalduko dizkie gaur eskualdeko literatura zaleei. Izan ere, Egizu! elkarteak antolatzen ohi duen Uribe Kostako Irakurzaleen Txokoak aipatu liburua aukeratu zuen irakurri eta hausnartzeko. Hitzordua, iluntzeko 8etan jarri dute Algortako Karitate kaleko Aldai Patronatuan. Eleberria 1938ko uztailaren 30ean abiatzen da, "faxistek Bilbo hartu zutenetik urtebetera, hiriburutik hurbil den herri batean". Bertan, hari bi gurutzatuko dira. Batetik, auto ofizial batean zenbait frankista nabarmen datoz: Augusto Beitia armadore eta estraperlista eskrupulu gutxikoa, eta Miguel Maria Sasnar, kazetari militar barren ustelekoa; misio ezkutu bat izan barri dute Bordelen, bizirik dirauen gerrak horrelako lan beltzak ere eskatzen baititu oraindik. Argazkian, Joxi Basterretxea Uxue Alberdirekin batera Santutxuko Irakurlearen Tartean emandako hitzaldi batean / cc-by-nc-nd Mahatsorria.
Bestetik, haiekin egingo du topo Basabe-Uriarte familiak. Sendi apala, lanaren nekeak eta maitasunaren pozak ahal bezala daramatzana, historiaren protagonista ez baizik haren biktima izaten ohitua. 70 urte geroago, familia horretako kide bat, Jose Santos, etxeko ganbaran ari da, gertakari haiek argitzen eta berreraikitzen, baita bere amodio istorioa bizitzen ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun