Eloy Velasco Espainiako Auzitegi Nazionaleko 6. Instrukzio Aretoko epaileak Itzubaltzeta / Romo eta Pinuetako jai batzordeko presidentea akusatu gisa galdekatu zuen urtarrilaren 16an. Jai batzordeak berak jakinarazi duenez, iazko jaietako liburuxkan argitaratutako bi iragarkitan "'terrorismoaren goratze' ustezko delituren bat egon daitekeela uste du magistratuak". Lehenengo iragarkian, Branka kultur elkartekoan, bi auzokide preso ageri dira: Imanol Beristain, Segi gazte erakunde ilegalizatuko kide izatea leporatuta 2010eko urriaren 22an atxilotu zutena eta egun preso prebentibo gisa epaiketaren zain dagoena eta Iñaki Gonzalo Casal "Kitxu" herriko kazetari, idazle eta presoa, Euskal Herritik urrun 15 urte baino gehiago eman dituena eta ama oso gaixorik duena. Biak ala biak "preso etarrak" dira epailearentzat. Bigarrenean, herriko txosna batzordekoan, epaileak ez du zehaztu zein izan daitekeen usteko legez kanpoko elementua. Bertan, "Euskal Presoak Euskal Herrira" lelopeko bandera bat ikus daiteke. Auziaren aurrean, herriko koadrila, dendari, ostalari eta auzokide guztiak deitu dituzte, etzi, larunbatean, Santa Eugenia plazan 20:00etan egingo duten asanblada informatibora. Argazkian, jaietako panpina.
Oraingoz jai batzordeko presidenteari leporatzen dioten "terrorismoaren goratzeak" urte bat eta bi urte bitarteko espetxe zigorra ekar dezake. Halere, jai batzordeko abokatuari diligentziak ukatu zizkioten deklarazio eguna heldu arte.
Sumarioan agertzen den jai liburuxka Ertzaintzak bildu zuen eta Leioa eta Getxoko Udaleei jai batzordea eta bere ordezkaritzari buruzko datuak eskatu zizkieten. Kasualitatez edo ez, Ertzaintzak eta Espainiako Auzitegi Nazionalak darabilten iragarkiak Getxoko PPk pasa den abuztuaren 3an prentsaren bidez lau haizeetara zabaldutako berberak dira.
Bestalde, itzubaltzetarrek gogoratu dute antzeko kontua pairatzen ari dela Erandioko Altzaga auzoko Sanagustinetako jai batzordea.
Itzubaltzeta / Romo eta Pinuetako jai batzordearen ustez, "gertatutakoak kolokan jar ditzake herriko jaiak eta orain arte herri honetan suspertu dugun jai herrikoien eredua. Izan ere, ahalegin bereziak egin beharko ditugu Inauteriak, Kuadrila Eguna, abuztuko herriko jaiak edo Olentzero aurrera eramateko", aldi berean akusazioei aurre egin behar badiete. Gainera, "auziak jai batzordean ohi ditugun parte-hartzea eta pluraltasuna kaltetu ditzakeelakoan gaude", dio jai batzordeak.
Bestalde, "gure herriko denda, taberna eta eragileen adierazpen askatasunaren aurkako eraso garbia dela" uste dute. Izan ere, UKBERRI.NETi adierazi diotenez, "jai batzordeak inoiz ez dio inori esan zer jarri zezakeen eta zer ez jaiei egindako ekarpenaren truke emandako espazioan".
Elkarretaratzearen kartela
Velascok ikertzen dituen eta 2011ko abuztuaren 3an Getxoko PPk salatu zituen jai-liburuxkako orriak
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.