Nazioartean zabaltzen den neurri berean, adierazpen askatasuna ulertzeko modu desberdinak aurkitzen dituela esan dute eta horrek herrialde bakoitzeko legeria onartzera behartzen omen dio. Beraz, legeek ematen diote neurria adierazpen askatasunari. Oso bitxia da. Are gehiago, ez du baztertzen Twitterrek herrialderen baten desagertzea, ideiak "hain desberdinak direlako".
Errealitate hurbilean, mendebaldeko Europan, Alemanian edota Frantziar estatuan hain justu, nazien alde egitearren tweetak zentsuratuak izan dira, herrialde hauetan nazien aldeko adierazpenak legez debekaturik direlako. Oso ondo. Baina Sarkozyk edota Zapaterok Libia bonbardatzea legearekin bat datorrelako? Mandela atxilotu zutenean buruzagi baltzaren aldeko tweetak egitea (oraindik ez zen existitzen, baina adibide bat da) ilegala litzateke? Otegiren aurpegiarekin batera "askatasuna" eskatzea ilegala da egun Espainiar estatuan?
Batzuen komentarioak ez direla publikatuko hemendik aurrera herrialde jakin batzuetan, bai aldiz beste lekuetan esan du Twitterrek goizez. Arratsaldez, aldiz, bozeramaile batek zehaztu egin du goizeko berria; "gure iragarkia ez du zentsurarekin zerikusirik. Legea bete baino ez dugu egingo". Ez dut zehaztasunik ikusten egia esanda.
Beldurra ematen du. Askatasuna, elkarrizketa, hartu-emana. Ez dira hauek sare sozialen azpian mantentzen diren oinarriak? Azkenik, mass-medioen akats guztiak hemen ere errepikatuko dira? Garai bateko boderearen gehiegikeriak egun legeaz mozorratzen dira. Hori badakigu ere.
Kepa Petralanda Goitia kazetari algortarrak gaur bere bitakoran argitaratutako artikulua
[© Kepa Petralanda Goitia] Ez dakit Twitter-ek esan duena zenbateraino den egia. Adierazpen askatasuna herrialde bakoitzean modu "desberdinean" ulertzen denez, horren arabera murriztuko ditu edukiak. Arabiar udaberria bezala ulertu den mugimenduan Twitterrek garrantzia izan bazuen ere (hori esaten dute batzuek behintzat) hemendik aurrera Egipton edota Libian gertatuko dena ez du islarik izango tweet-etan? Egipton gaur boterean dauden militarrek, aurreko buruzagiak baino sinesgarritasun gehiago dute? Libian egun Gadafiren jarraitzaileak torturatzen dituztenek ez dute merezi NATOren erasorik? Argazkia: cc-by Rosaura Ochoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun