ELAk zabaldu duenez, azken erreformarekin "soldatak jaitsi egingo dira; kaleratzeak eta langabezia gehitu egingo dira; kalte-ordainak zeharo murriztuko dira, eta pobrezia asko hedatuko da". Horregatik, uste dute erreformaren helburua "kapitalari indar gehiago ematea" dela, izan ere, "eskubide laboral eta sozialek ez daukate zerikusirik krisiaren jatorriarekin, baina ebidentzia hau gorabehera, egiten den politikak eskubide horiekin ordaindu nahi dute krisia. Jokabide hau injustizia nabarmena delako gaude hemen, eta kalean izango gaituzte martxoaren 29an ere: eskubide laboral, sindikal eta sozialen alde kalean", berretsi zuen Arrietak.
Dena den, atzokoa ez da sindikatu abertzaleak azken aldi honetan burutu duen protesta bakarra. Hilaren 2an, 184 delegatu batu zituzten Areetako Andres Isasi musika eskolan, lan erreforma azaldu eta haien lan zentroetan testu horrek ekarriko dituen eskubide murrizketen berri eman zezaten. Ondoren, manifestazioa egin zuten Areetan zehar. Besteak beste, lan gatazkan dabilen Beaz foru enpresako kideak izan ziren bertan.
Hiru greba eta hamaika babes
Euskal gehiengo sindikalak proposatutako greba orokorrera batu zaizkio arlo zehatz batzuetako langileak ere: SATSE erizaintza sindikatuak, SME Euskadiko Medikuen sindikatuak, FFHE erietxeetako medikuen federazioak, SAE erizaintza laguntzaileen sindikatuak eta UTESE osasun arloko teknikoen bilkurak lanuzteak egingo dituzte egun horretan. Bestalde, "Murrizketarik ez. Inposiziorik ez" lelopean, hilaren 27an Bilbon manifestazioa egitea erabaki dute ErNE, ELA, ESAN, SIPE eta EUSPEL Ertzaintzaren sindikatuek. Halaber, 29an Erandioko ertzain-hirian egingo dute itxialdia langile erakundeetako ordezkariek.
Halere, martxoaren 29rako beste bi greba deialdi daude: Euskal Herriko CNTk egin duena eta egun horretarako CCOO eta UGT sindikatuek Espainiako Estatuan deitu dituzten lanuzteak.
LAB, ELA, EILAS, EHNE, Hiru, CGT eta ESK sindikatuek zein gizarte eragile ugarik martxoaren 29rako Hego Euskal Herrirako deitu duten greba orokorraren berotze lanak nabarmenak izaten ari dira egunotan. Atzo bertan, ELAko 21 sindikalistek elkarretaratze entzutetsua egin zuten Alderdi Popularrak Areetan duen egoitzaren aurrean. Gauzak horrela, langileen eta jendartearen eskubideei egindako murrizketak salatu eta bereziki otsailean Mariano Raxoiren Gobernuak dekretuz onartutako lan eta negoziazio kolektiboaren erreforma gaitzetsi zuten. Deiane Arrieta Eskumaldeko ELAko kidearen arabera, "PP izan da patronalari behar zuena eman dion azkena. Aurretik egindako erreformek (pentsioetan, eskubide laboraletan, aurrekontuak egiterakoan...) PPz gain, beste sustatzaile batzuk izan ditu (alderdi politiko, erakunde eta sindikatuak). Eta gaur hemen batu gara, PPri gure haserrea adierazteko, baina baita negoziazio prozesu murriztaileetan esku hartzen dutenei ados ez gaudela esateko ere", Arrietak azaldu zuenez. Bere aldetik, PPren egoitza zaintzen duten Castellana de Seguridad enpresako guardiek argazkiak egin zizkieten sindikalistei.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun